Tirthaprakasha 4.p50

4.p50

ata eva kāśīkhaṇḍe, mandarādrigatenāpi kṣetraṃ naitat pinākinā | vimuktaṃ liṅgarūpeṇa avimuktaṃ tataḥ smṛtam || idameva mahattattvamṛtamiti alpāyasenevātra mokṣaprāpteḥ tathā, dhyāyadastatra māṃ nityaṃ yogāgnirdadīpyate bhṛśam | kaivalyaṃ paramaṃ yāti devānāmapi durlabham || avyaktaliṅgairmunibhiḥ sarvasiddhāntavādibhiḥ | iha samprāpyate mokṣo durlabho'nyatra karhicit || tebhyaścāhaṃ prayacchāmi yogaiśvaryyamanuttamam | ātmanaścaiva sāyujyamīpsitaṃ sthānameva vā || kuberastu mahāyakṣastathā sarvārpitakriyaḥ | kṣetrasaṃsevanādeva gaṇeśatvamavāpa ha || saṃvartto bhavitā yaśca so'pi bhaktyā mamaiva tu | ihaivārādhya māṃ devi siddhiṃ yāsyatyanuttamām || parāśarasuto yogī ṛṣirvyāso mahātapāḥ | dharmayukto bhaviṣyaṃśca .vedasaṃsthāpravarttakaḥ || vetsyate so'pi padmākṣi kṣetre'sminmunipuṅgavaḥ | brahmā devarṣibhiḥ sārddhaṃ viṣṇurvāyurdivākaraḥ || devarājastathā śakrastathānye tridivaukasaḥ | upāsate mahātmānaḥ sarve māmiha suvratāḥ || anye ca yoginaḥ siddhāśchannarūpā mahāvratāḥ | ananyamanaso bhūtvā māmihopāsate sadā || alarkaśca purīmetāṃ matprasādādavāpsyate