Tirthaprakasha 4.p53

4.p53

brāhmaṇāḥ kṣatriyā vaiśyāḥ śūdrā vai varṇasaṅkarāḥ | kṛmimlecchāśca ye cānye saṅkīrṇāḥ pāpayonayaḥ || kīṭāḥ pipīlikāścaiva ye cānye mṛgapakṣiṇaḥ | kālena nidhanaṃ prāptā avimukte śṛṇu priye || candrārddhamaulinaḥ sarve lalāṭākṣā vṛṣadhvajāḥ | śive mama pure devi jāyante tatra mānavāḥ || akāmo vā sakāmo vā api tiryaggato'pi vā | avimukte tyajan prāṇān mama loke mahīyate || avimuktaṃ yadā gacchet kadācitkālaparyyayāt | aśmanā caraṇau bhittvā tatraiva nidhanaṃ vrajet || tathā, yāni tīrthāni śrūyante triṣu lokeṣu suvrate | avimuktasya pāde tu nityaṃ sannihitāni vai || tathā, yastatra nivasedvipro'saṃyuktātmā'samāhitaḥ | trikālamapi bhuñjāno vāyubhakṣasamo bhavet || nimeṣamātramapi yo hyavimukte tu bhaktimān | brahmacaryyasamāyuktaḥ sa paraṃ prāpnuyāttapaḥ || yo'tra māsaṃ vaseddhīro laghvāhāro jitendriyaḥ | samyaktena vrataṃ cīrṇaṃ divyaṃ pāśupataṃ mahat || janmamṛtyubhayaṃ tīrtvā sa yāti paramāṃ gatim | naiḥśreyasīṃ gatiṃ puṇyāṃ tathā yogagatiṃ vrajet || na hi yogagatirlabhyā janmāntaraśatairapi | prāpyate kṣetramāhātmyāt prabhāvācchaṅkarasya tu