Tirthaprakasha 4.p58.1

4.p58.1

kāśīkhaṇḍe, prayāgato'pi tīrtheśāt sarveṣu bhuvaneṣvapi | anāyāsena vai muktiḥ kāśyāṃ dehāvasānataḥ | prayāgādapi vai ramyamavimuktaṃ na saṃśayaḥ || yatra viśveśvaraḥ sākṣāt svayaṃ samadhitiṣṭhati | avimuktānmahākṣetrādviśveśasamādhiṣṭhitāt || na ca kiñcitkvacidramyamiha brahmāṇḍagolake | avimuktamidaṃ kṣetramapi brahmāṇḍamadhyagam || brahmāṇḍamadhye na bhavet pañcakrośapramāṇataḥ | yathā yathā hi varddheta jalamekārṇavasya ca || tathā tathonnayedīśastat kṣetraṃ pralayādapi | kṣetrametat triśūlāgre śūlinastiṣṭhati dvija || antarikṣe na bhūmiṣṭhaṃ nekṣante mūḍhabuddhayaḥ | sadā kṛtayugaṃ cātra mahāparva sadātra vai || na grahāstodyakṛto doṣo viśveśvaryālaye | sadā saumyāyanaṃ tatra sadā tatra mahodayaḥ || sadaiva maṅgalaṃ tatra yatra viśveśvarasthitiḥ | yathā bhūmitale vipra puryyaḥ santi sahasraśaḥ || tathā kāśī na mantavyā kāpi lokottarā tviyam | mayā sṛṣṭāni viprendra bhuvanāni caturdaśa || asyāḥ puryyā vinirmātā svayaṃ viśveśvaraḥ prabhuḥ | purā yamastapastaptvā bahukālaṃ suduścaram || trailokyādhikṛtiṃ prāptastyaktvā vārāṇasīṃ purīm | carācarasya sarvāṇi yāni karmāṇi tāni ca || gocare citraguptasya kāśīvāsakṛtādṛte | praveśo yamadūtānāṃ na kadācidvijottama || tathā, adya prātaḥ paraśvo vā maraṇaṃ prāptameva ca | yāvatkālaṃ vilambo'sti tāvat kāśīṃ samāśrayet || tathā, dūraṃ me maraṇaṃ yuvā'hamadhunā dhāryaṃ na citte tviti śrotavyo nibhṛtaṃ kṛtāntamahiṣagraiveyaghaṇṭāravaḥ |