Tirthaprakasha 4.p57

4.p57

evamastvityanujñāya tatraivāntaradhīyata || na tadgṛhaṃ na sā devī na devo jñāyate kvacit | evaṃ trailokyavikhyātaḥ purā vyāso mahātapāḥ || jñātvā kṣetraguṇān sarvān sthitastasyaiva pārśvataḥ | evaṃ vyāsaṃ sthitaṃ jñātvā kṣetraṃ śaṃsanti paṇḍitāḥ || tathā, tapāṃsi yāni paṭhyante vratāni niyamāśca ye | sarvatīrthābhiṣekaṃ tu sarvadānaphalāni ca || sarvayajñeṣu yatpuṇyamavimukte tadāpnuyāt | pādme, bhūridyumnaṃ prati sālaṅkāyanavākyam | kāśīṃ gaccha mahārāja sarvapāpapraṇodinīm | samprāpya sakalaṃ pāpaṃ kṣayayiṣyasi sarvathā || pratyayārthaṃ ca rājendra nīlīsicayasambhavān | aniśaṃ kañcukān pañca paridhatsva mahāmate || ākāśīdarśanāntā hi dṛṣṭāḥ syuścandrasannibhāḥ | kañcukā hi yadā nailyaṃ jahuḥ kāśīvilokanāt || tadā tvaṃ tattvakaluṣaṃ kṣayitaṃ vetsi sarvaśaḥ | brahmapurāṇe, brahmovāca | avimuktaṃ ca bhavataḥ sthānaṃ yadvai purātanam | kapālamocanaṃ tīrthaṃ tava tatra bhaviṣyati || ahaṃ ca tvaṃ sthitastatra viṣṇuścāpi gamiṣyati | darśanāt bhavatastatra mahāpātakinaśca ye || te'pi bhogaṃ samaśnanti viśuddhā bhavane mama | tathā, vimukto brahmahatyāyāstiṣṭha rudra yathāsukham | avimukte mayā datte tiṣṭha tvaṃ bhāryayā saha || liṅgapurāṇe, anyacca te pravakṣyāmi upāyaṃ jñānasādhanam | yāni tīrthāni coktāni vyomatantre purā mayā || teṣāmatyadhikaṃ tīrthamavimuktaṃ mahāmune | sarvatīrthāni ca mayā tasmin sthāne pratiṣṭhitāḥ || na kadācinmayā muktaṃ sthānaṃ ca satataṃ mune | sarvatīrthamayaṃ puṇyaṃ guhyādguhyataraṃ mahat || sthānānāṃ caiva sarveṣāmādibhūtaṃ maheśvaram | yatra siddhiṃ parāṃ prāptā munayo munisattama || anenaiva śarīreṇa prāptaṃ nirvāṇamuttamam | tatra caivaṃ tu sambhūto jñānaṃ cāpnoti mānavaḥ || gaccha vārāṇasīṃ śīghraṃ yatra devaḥ sanātanaḥ | devatābhiḥ samastābhistatra devaḥ pinākadhṛk || stūyate varado devairbrahmādibhirabhīkṣṇaśaḥ | tatrāsirvaraṇā caiva nimnage siddhasevite || bahujanmārttapāpānāṃ naṣṭānāṃ dehināṃ bhuvi | kṣālanaṃ kurute devī sā nadī tatra jāhnavī || yā dṛśā sarvabhūtānāṃ yā svargaḥ saritāṃ varā | yā mātā sarvabhūtānāṃ sā gaṅgā yatra nimnagā