Tirthaprakasha 4.p73

4.p73

anyatra kṛtvā pāpāni bahūni sumahanti ca | aśraddadhāno'tattvajño yadyatra ca vipadyate || mahimanyanabhijño'pi kṣetrasyāsya janārdana | tasya yā gatiruddiṣṭā tāṃ niśāmaya suvrata || pañcakrośīṃ praviśatastasya pātakasantatiḥ| bahireva pratiṣṭheta nāntarniviśate kvacit|| tathā bahiḥ sthitāyāṃ ca tasya pātakasantatau| triśūlapāśapāṇīnāṃ gaṇānāṃ sīmacāriṇām|| praveśamātrādanaghaḥ sarvairenobhirujjhitaḥ| iti| kalpatarukṛtā tu kāśīkṛtaduṣkṛtabhogapratipādakāni vacanāni na likhitāni| atra kaścinmāheśvaramāyāmugdha idamāhapratīmastāvadetānavimuktaguṇān paraṃ tvavimukte muktijananaśaktiḥ kalāvavasanneti| eṣa viśveśvaro deva eṣaiva maṇikarṇikā| kalāvantarhitā kāśī muktiratraiva saṃsthitā|| ityekāmramāhātmyaprakaraṇe śravaṇāt| antarddhānaṃ kalau yāti tatpuraṃ tu mahātmanaḥ| antarhite pure tasmin purī tu vasate punaḥ|| iti harivaṃśavacanācceti| sa prativaktavyaḥ| jñātvā kaliyugaṃ ghoraṃ hāhābhūtamacetanam| avimuktaṃ na muñcanti kṛtārthāste narā bhuvi|| iti kalpatarusaṅgṛhītavacanavirodhāt| jñātvā kaliyugaṃ ghoramadharmabahulaṃ janāḥ| kṛttivāsaṃ na muñcanti kṛtārthāste na saṃśayaḥ|| iti kūrmapurāṇādivacanavirodhācca| antarddhānaṃ kalau yāti tatpuraṃ tu mahātmanaḥ| iti vacanasya kā vārttā| kuśalaiva| maṇikāñcanamarīcinicayacumbitajyotirmayaṃ tatpuramantarddhatta ityāśayāditi prāñcaḥ| vastutaḥ tatpuraṃ tatpurādhiṣṭhātrī devatetyarthaḥ| pūrvaṃ hi prathamānavigrahā nigrahānugrahādipaṭīyasī devī carmacakṣuṣāṃ gocarībabhūva na kalāviti | tatra vārāṇasī devī sthitā vigraharūpiṇī | mānavānāṃ hitārthāya sthitā devasya paścime || iti vacanāditi | evañca— antarhite pure tasmin purī tu vasate punaḥ | ityasya svarṇādimayapurādhiṣṭhātṛdevatāyāmantarhitāyāṃ vārāṇasī purī yathāpūrvaṃ phaladātrī tiṣṭhatyevetyarthaḥ | puraṃ vidyate yasya sa purī girīśo yathāpūrvaṃ tatra sannihita eveti vārthaḥ | athavā puraṃ śarīraṃ maheśasya antarddhānaṃ yāti purī śarīrī maheśo vasatta ityarthaḥ | ata eva śivapurāṇe, antarhite kalau vyāsastasminnāyatane prabhuḥ | anugrahaṃ ca kurute bhagavānativatsalaḥ || iti | atha kṣetramānam | matsyapurāṇe, dviyojanamathārddhaṃ ca pūrvapaścimarataḥ sthitam | arddhayojanavistīrṇaṃ dakṣiṇottarataḥ smṛtam || varaṇā ca nadī yāvadyāvacchuṣkanadī tathā | evaṃ kṣetrasya vistāraḥ prokto devena dhīmatā || śuṣkanadī asī | tathā, dviyojanaṃ tu tat kṣetraṃ pūrvapaścimarataḥ sthitam | arddhayojanavistīrṇaṃ dakṣiṇottarataḥ smṛtam || varaṇā ca nadī yāvadyāvacchuṣkanadī tathā | bhīmacaṇḍikāmārabhya parvateśvaramantike || brahmapurāṇe, varaṇā cāpyasiścaiva dve nadyau suravallabhe | antarāle tayoḥ kṣetraṃ bhumāvapi viśenna tat || skandapurāṇe, catuṣkrośaṃ caturdikṣu kṣetrametatpratiṣṭhitam | yojanaṃ viddhi cārvaṅgi mṛtikāle 'mṛtapradam || brahmapurāṇe, pañcakrośapramāṇaṃ tu kṣetraṃ dattaṃ mayā tava