Tirthendushekhara 3.p21

3.p21

antaḥkaraṇasaṃśuddhiṃ prāpnuyādvijitendriyaḥ | tīrthāntarāṇi kṣetrāṇi viṣṇubhaktiśca nārada || antaḥkaraṇasaṃśuddhiṃ janayanti na saṃśayaḥ | vārāṇasyapi devarṣe tādṛśyeva paraṃ tu sā || prakāśayati brahmaikyaṃ tārakasyopadeśataḥ | anenaiva viśeṣeṇa tāṃ praśaṃsanti tāttvikāḥ || sākṣādvārāṇasī muktyai viṣṇorbhaktistathāvidhā | tathāpi viṣṇubhaktistu dvitraireva vibhāvyate || kāśī tu tiryagbhūtānāmapi sādhāraṇī matā | kāśyāṃ kṛtena pāpena yātanāmatibhīṣaṇām || prāpya paścādvimucyante sarvathā kṣīṇakalmaṣāḥ | vārāṇasyāṃ kṛtaṃ karma nīlakaṇṭhāya cārpitam || manaḥ śuddhiṃ vidhāyāśu tattvajñānāya kalpate | yatkarma kāśyāṃ kurvīta śubhaṃ vā yadi vā'śubham || akṣayaṃ tatprabhavati nā'tra kāryā vicāraṇā | dharmiṣṭhasyātra daityendra śarīratyāgamātrataḥ || apavargo bhavatyeva tadanyasya vilambataḥ | etatkṛtāghasaṃghāto ghorāṃ bhuktvā tu yātanām || paiśācaṃ samavāpnoti varṣāṇāmayutatrayam