Tirthendushekhara 3.p25

3.p25

brahmeśāno dakṣiṇe saṃpradiṣṭastattu proktaṃ bhavanaṃ viśvabhattu̍ḥ || caturvidhe'pi kṣetre'smin pramīto garbhayātanām | naivāpnoti muniśreṣṭha viśeṣo'yaṃ paraḥ smṛtaḥ || kāśyāṃ mṛtastu sālokyaṃ sākṣātprāpnoti sattamaḥ | vārāṇasyāṃ mṛto jantuḥ sākṣātsārūpyamaśnute || avimukte vipannastu sākṣātsānnidhyamāpnuyāt | tataścidānandamayaṃ brahmaeyeva vilīyate || tataḥ tadantargate'ntargṛhe | salokatāṃ sarūpatāṃ sānnidhyaṃ cāpi sattamaḥ || kalpakālamavāpnoti tato brahmātmako bhavet ! caturdhāvitate kṣetre sarvatra bhagavān śivaḥ || vyācaṣṭe tārakaṃ vākyaṃ brahmaikyapratibodhakam | tathāpi tattatsāmarthyāttatra tatra mṛtasya hi || bhogapūrvāpavargāptirjīvanmuktirdaśaiva sā | kimatra citraṃ viprendrāḥ kāśyāṃ muktisamāgame || bhāgīrathīvimiśrāyāṃ tīrthasāmarthyasampadi | kevalā jāhnavī viprā jñātā'jñātā'thavā punaḥ || apavargaṃ vitarati svataḥ'pi tyaktadehinaḥ | yasya kasyāpi vā jantorbhāgīrathyāṃ gatāyuṣaḥ || na durlabho brahmabhāvastatsaṅgakṣapitāṃhasaḥ | cidānandamayaṃ brahma gaṅgābhāvamupāgatam || bravīmi satyamevaitannātra vaḥ saṃśayo bhavet | iyaṃ somodbhavā puṇyā sarito'nyāśca yā bhuvi || tāḥ sarvā jāhnavīnīravyāplutā eva pāvikāḥ | evaṃprabhāvā nirvāṇaṃ toyarāśivahā nadī || bhāgīrathītivikhyātā kṣetre śambhorvimuktide | ekaikamapi viprendrāḥ sākṣādbrahmaptisādhanam || na citramatra dvitayaṃ yannirvāṇāya kalpate | īdṛśī svarnādī yatra sarvatīrthamayī śubhā || tāṃ kāśīṃ ko na seveta bhīmaṃsaṃsāramuktaye