Vratakhanda 106.p2.18

106.p2.18

yo'dhīte saptamīkalpaṃ sopākhyānañca śāṅkaram
ācāryyaḥ saddijojñeyo varṇānāmanupūrvvaśaḥ
saurāṇāṃ vaiṣṇavānāñca śaivānāṃ pārvvatīpatiḥ
alābhe tu suvarṇasya rathaṃ rājatamādiśet
tadalābhe tāmramayaṃ rathaṃ vyomañca kārayet
alābhena ca tāmrasya rathaḥ piṣṭamayaḥsmṛtaḥ
sahiraṇyaṃ mahādevaṃ tāmrabhājanamāsthitam
kāṣāyayugmasahitaṃ brāhmaṇāya nivedayet
pūrvoktena mahādeva vācakāya mahādyute
pañcaratnamamāyuktaṃ śubhāṅgaprāhataṃ sitaṃ
svaśaktyā tu virūpākṣaṃ vittaśāṭhyaṃ vivarjayet
eṣā puṣyā pāpaharā rathāṅgā saptamī hara
kathitā te mayā rudramahatīyaṃ prakīrttitā
snānaṃ dānamatho homaḥ pūjanaṃ ṣar̤anāśvakam
śatasāhasrikaṃ puṇyaṃ bhūtyai bhūdhara vidyate
evameṣā puṣyatamā māghe prāptā tu saptamī
yāmupoṣya narobhaktyā sūryyasyānucarobhavet
brāhmaṇo yāti devatvaṃ kṣatriyovipratāṃ vrajet
vaiśyastu kṣatratāṃ yāti śūdro vaiśyatvameti vai
vidyāvinayasampannaṃ bharttāraṃ kanyakā labhet
aputrā strī sutaṃ vindāt saubhāgyañca madhādhipa
vidhavā cāpyupoṣyaināmuttamaṃ† lokamaśrute
nānyajanmasu vaidhavyaṃ prāpnuyātpārvatīpriya
bahuputrā bahudhanā bharturvallabhatāṃ vrajet
yāvadbhiḥ saptajanmāni nārī vā puruṣastathā
iti bhaviṣyapurāṇoktaṃ rathāṅgasaptamīvratam
vāsudeva uvāca
māghasya śuklapakṣe tu pañcamyāñca kurudvaha
ekabhaktaṃ samākhyātaṃ ṣaṣṭhayāṃ naktamudāhṛtam
saptamyāmupavāsañca kecidicchanti suvrata
ṣaṣṭhayāṃ kecidaśantoha saptamyāṃ rādhanaṃ kila
kṛtopavāsaḥ ṣaṣṭhayāntu pūjayedbhāskaraṃ budhaḥ
raktacandanamiśraistu karavīraiḥ samāhṛtaiḥ
guggulena mahābāho sugandhena ca suvrata