Vratakhanda 96.p6.3

96.p6.3

kena karmmaprabhāvena satyaṃ brūhi mahāmune
vāmadeva uvāca
aho nṛpavaraśreṣṭha satyavādin jitendriyaḥ
pṛṣṭavān gahanaṃ praśnaṃ durvijñeyamavaddhibhiḥ
manonukūlā pravaraṇā bhāryyā putraśca tādṛśaḥ
nahyalpapuṇyaiḥ rājendra prāpyate puruṣaiḥ kvacit
yena puṇyena sakalaṃ prāpyate bhuvi mānavaiḥ
tatsarvvaṃ śṛṇu bhūpāla yathā rājyamavāptavān
purā janmani śūdrastvaṃ satyaṃ na vadasi kvacit
itthaṃ kathaṃ na jānāsi tava bhāryā pativratā
tava samīpe viprāśca catvāro vedapāragāḥ
satkarmaniratāḥ śāntā vidvāṃsaśca jitendriyāḥ
catvāro vedadharmajñāstava te prativeśinaḥ
teṣāṃ kṛtavatāmetadaśūnyaśayanavratam
śrutvā mahāphalaṃ dṛṣṭvā tvayāpyetadanuṣṭhitam
arghyaṃ dattvā tu candrasya udaye dvitīyādine
udakañca ghṛtañcaiva māṣacāravivarjitam
prāśanānte ghṛtaṃ dattvā brāhmaṇāya viśeṣataḥ
caturvarṣasamāyuktaṃ cāturmāsye sadā nṛpa
vratasyāsya prabhāvena suto labdho'bhivāñchitaḥ
sandhyāvalīsamā bhāryā dharmāṅgadasamaḥsutaḥ
anye ye ca kariṣyanti phalaṃ sarvvaṃ labhanti te
putra pautra samāyukto dhana dhānya samākulaḥ
vratasyāsya prabhāvena svargaṃ prāpnoti mānavaḥ
gaccha tvaṃ nṛpa śārdūla bhokṣyase sakalāṃ mahīm
jāyā putra samāyuktaḥ svargaṃ gacchasi nānyathā
śatānīka uvāca
kathayasva vrataṃ deva prakāreṇa samanvitam
udyāpanaṃ kathaṃ kuryyātparipūrṇe vratottame
ṛṣiruvāca
candrodaye vrataṃ kuryyāccaturvarṣamidaṃ nṛpa
ācāryyaṃ vedaviduṣaṃ dharmmajñaṃ varayedatha
ṛtvijaiśca samāyuktaṃ brāhmaṇairvedapāragaiḥ
yajñopavītaṃ vastrañca upānahasamanvitam
suvarṇaṃ raupyamudrāśca haimaṃ kṛtvā tu vaiṣṇavam