Vratakhanda 98.p1.4

98.p1.4

jayayā muni kanyānāṃ yatpurā samudāhṛtam
evaṃ yā kāpi kurute nārī vratamidaṃ śubham
sā rūpasaubhāgyayutā mṛtā svarge mahīyate
na durbhagā kule tasyāḥ kācidbhavati bhārata
na durvinītaśca suto na bhṛtyo viplavadbhavet
na dāridraṃ gṛhe tasmin na vyādhirupajāyate
yatra sā ramate nārī dhautacāmīkara prabhā
anyāśca yāścariṣyanti brāhmaṇāmumate vratam
saṃpūjya vācakaṃ bhaktyā bhūṣaṇācchādanādibhiḥ
tāstāḥsyuḥ sukhasaṃpannā avipannamanorathāḥ
bhaviṣyanti kuruśreṣṭha kulajyeṣṭha namī'stu te
māghe mahārhamaṇimaṇḍitapādapīṭhāṃ
caitre vicitrakusumotkara carcitāṅgīṃ
sūryyaprarūḍha navaśaṣpamayīṃ nabhasye
saṃpūjya śambhudayitāṃ prabhavanti nāryyaḥ
iti bhaviṣyottare caitrabhādramāghahṛtoyāvratam
kṛṣṇa uvāca
bahunātra kimuktena kiṃ vahuttaramālayā
vaiśākhasya sitāmekāṃ tṛtīyāmakṣayāṃ† śṛṇu
tasyāṃ srānaṃ japo homaḥ svādhyāyaḥ pitṛtarpaṇam
dānañca kriyate kiñcit tatsarvvaṃ syādihākṣayam
ādiḥ kṛta yugasyeyaṃ yugāditvena kathyate
sarvvapāpa praśamanī sarvva saukhyapradāyinī
purā mahodaye pārtha vaṇigāsīt sunirdhanaḥ
priyaṃvadaḥ satyadhṛtti rdeva brāhmaṇa pūjakaḥ
puṇyākhyānaikacitto'bhūt kuṭumbavyākulopi san
tena śrutā vācyamānā tṛtīyā rohiṇīyutā
yadā syāt budhasaṃyuktā tadā sā sumahatphalā
tasyāṃ yaddīyate kiñcidakṣayaṃ syāttadeva hi
iti śrutvā sa gaṅgāyāṃ sammarthya pitṛdevatāḥ
gṛhamāgatya karakān sānnānudakasaṃyutān
saktupūrṇān vṛhatkumbhān jalena vimalena ca
yavagodhūmacaṇakān saktudadhyodanaṃ tathā
ikṣukṣīravikārāṃśca sahiraṇyāṃśca śaktitaḥ
śuciḥ śuddhena manasā brāhmaṇebhyo dadau vaṇik