Bhagavatapurana 37.20

37.20

subodhinī - pratibandhābhāvamāśaṅkyāha niṣidhyamānā iti, udāsīnānāṃ bhāṣaṇaṃ niṣiddhamataḥ sambandhibhireva niṣiddhāḥ, balavad bādhakaṃ ca tat, pitarotra noktā anyathotpattivirodhaḥ syāt, upapattivirodhe tu śāstraṃ baliṣṭhaṃ, tāsāṃ caturvidhapuruṣārthāścaturbhirdeyā dharmadaḥ patirarthado bhrātābhilaṣitārthadātāro bāndhavāḥ sutā mokṣadāḥ, teṣāṃ niṣedhe tattatpuruṣārthahānistathāpi pañcamameva puruṣārthaṃ manyamānā gatā evetyāha bhagavatīti, bhagavānstu ṣaḍguṇaḥ svayaṃ caikotaḥ satapuruṣārthāstatra sidhyanti, kiñcottamaśloka iti, uttamaiḥ siddhapuruṣārthairapi ślokyateto bhaktirapyaṣṭamaḥ puruṣārthaḥ, kiñca kāmito hi puruṣārtho bhavati na tvakāmitoto dharmādīnāmapuruṣārthataiva kintu bhagavānneva puruṣārtha ityabhiprāyeṇāha dīrghaśrutadhṛtāśayā iti, dīrghakālaparyantaṃ yaḥ śruto yadvā śrutaṃ tasmin tena vā dhṛta āśrayo yābhiḥ, yathā phalaśravaṇena phale cittaṃ bhavati tathā bhagavati cittaṃ na tvanyatra, niṣedhotra vācanika ṛtvijāṃ karmavaiyagryāt, na hyānyabhāryā anyena spraṣṭuṃ śakyā yāganāśaśca syādato yajamānapatnīvyatiriktāḥ sarvā eva gatā ekarūpāśca, ṛtvijāṃ miśrapratiṣedhāt 'yūnaḥ sthavirān ve'ti, yajamānastu visadṛśopi bhavatyato gatā eva |
subodhinī--gatānāṃ samāgamanaprakāramāha yamuneti, yamunopavane vicarantaṃ striyo dadṛśuritisambandhaḥ, jalasthala krīḍāyogyabhūmiḥ sūcitā, upavane puṣpāṇi phalāni ca sarvadā bhavanti tathāvidhānyevāropyanta iti, yamunā kūretyupavana rakṣā yamabhāgābhāvaśca, gatānāmubhayaparityāge śokaḥ syāditi tannivṛttyarthamāhāśokānāṃ navapallavaimaṇḍita iti, anena śayyā api nirūpitāḥ, tādṛśe vibhāvādidyukte gopairmugdhairvṛtaṃ viśeṣeṇa haṃsagatyādinā gacchantaṃ sāgrajaṃ kriyāśaktisahitaṃ sarvato rakṣaṇasamartha dadṛśuḥ svābhilaṣitaprakāreṇa dṛṣṭavatyo yataḥ striyaḥ |