Brahmavaivartapurana 3.4.238.4

3.4.238.4

madbhaktāścaiva niḥśaṃkāḥ karmanirmūlakārakāḥ .. 41 ..
devāḥ kālasya kālo'haṃ vidhātā dhātureva ca ..
saṃhārakartuḥ saṃhartā pātuḥ pātā parātparaḥ .. 42 ..
mamājñayā'yaṃ saṃhartā nāmrā tena haraḥ smṛtaḥ ..
tvaṃ viśvasṛṭ sṛṣṭihetoḥ pātā dharmasya rakṣaṇāt .. 43 ..
brahmāditṛṇaparyantaṃ sarveṣāmahamīśvaraḥ ..
svakarmaphaladātā'haṃ karmanirmūlakārakaḥ .. 44 ..
ahaṃ yānsaṃhariṣyāmi kasteṣāmapi rakṣitā ..
yānahaṃ pālayiṣyāmi teṣāṃ haṃtā na ko'pi vā .. 45 ..
sarveṣāmapi saṃhartā sraṣṭā pātā'hameva ca ..
nāhaṃ śaktaśca bhaktānāṃ saṃhāre nityadehinām .. 46 ..
bhaktā mamānugā nityaṃ matpādārcanatatparāḥ ..
ahaṃ bhaktāṃtike śaśvatteṣāṃ rakṣaṇahetava .. 47 ..
sarve naśyaṃti brahmāṇḍe prabhavaṃti punaḥpunaḥ ..
na me bhaktāḥ praṇaśyanti niḥśaṃkāśca nirāpadaḥ .. 48 ..
ato vipaścitaḥ sarve dāsyaṃ vāṃchaṃti no varam ..
ye māṃ dāsyaṃ prayācaṃte dhanyāste'nye ca vaṃcitāḥ .. 49 ..
janmamṛtyujarāvyādhi bhayaṃ ca yamayātanā ..
anyeṣāṃ karmiṇāmasti na bhaktānāṃ ca karhicit .. 4.6.50 ..
bhaktā na liptāḥ pāpeṣu puṇyeṣu sarvaka rmiṇaḥ ..
ahaṃ dhunomi teṣāṃ ca karmabhogānsuniścitam .. 51 ..
ahaṃ prāṇaśca bhaktānāṃ bhaktāḥ prāṇā mamāpi ca ..
dhyāyaṃte te ca māṃ nityaṃ tānsmarāmi divāniśam .. 52 ..
cakraṃ sudarśanaṃ nāma ṣoḍaśāraṃ sutīkṣṇakam ..
yattejaḥ ṣoḍaśāṃśo'pi nāsti sarveṣu jīviṣu .. 93 ..
bhaktāntike tu taccakraṃ dattvā rakṣārthamīpsitam ..
na svāsthyaṃ na ca prītirme yāmi teṣāṃ ca sannidhim .. 54 ..
na me svāsthyaṃ ca vaikuṃṭhe goloke rādhikāṃtike ..