Kurmapurana (Ananta Gokhale) 10.p32

10.p32

saṃstutā daityapatinā putratve jagṛhe'ndhakam || tataḥ sa mātṛbhiḥ sārddhaṃ bhairavo rudrasambhavaḥ | jagāma tvājñayā śambhoḥ pātālaṃ parameśvaraḥ || yatra sā tāmasī viṣṇormūrttiḥ saṃhārakārikā | samāste hariravyakto nṛsiṃhākṛtirīśvaraḥ || tato'nantākṛtiḥ śambhuḥ śeṣeṇāpi supūjitaḥ | kālāgnirudro bhagavān yuyojātmānamātmani || yuñjatastasya devasya sarvvā evātha mātaraḥ | bubhukṣitā mahādevaṃ praṇamyāhustrilocanam || mātara ūcuḥ | bubhukṣitā mahādeva tvamanujñātumarhasi | trailokyaṃ bhakṣayiṣyāmo nānyathā tṛptirasti naḥ || etāvaduktvā vacanaṃ mātaro viṣṇusambhavāḥ | bhakṣayāñcakrire sarvvaṃ trailokyaṃ sacarācaram || tataḥ sa bhairavo devo nṛsiṃhavapuṣaṃ harim | dadhyau nārāyaṇandevaṃ† praṇamya ca kṛtāñjaliḥ || umeśacintitaṃ jñātvā kṣaṇātprādurabhūddhariḥ | vijñāpayāmāsa ca taṃ bhakṣayantīha mātaraḥ