Lingapurana 2.28

Liṅgapurāṇa 2.28

Language: Sanskrit

2.28.96 — 1 part

2.28.1

sūta uvāca
snātvā devaṃ namaskṛtya devadevamumāpatim /
divyena cakṣuṣārudrāṃ nīlalohitamīśvaram //

2.28.2

dṛṣṭvā tuṣṭāva varadaṃ rudrādhyāyena śaṅkaram /
devo 'pi tuṣṭyā nirvāṇaṃ rājyānte karmaṇaiva tu //

2.28.3

tavā stīti sakṛccoktvā tatraivāntaradhīyata /
svāyaṃbhuvo manurdevaṃ namaskṛtya vṛṣadhvajam //

2.28.4

āruroha mahāmeruṃ mahāvṛṣamiveśvaraḥ /
tatra devaṃ hiramyābhaṃ yogaiśvaryasamanvitam //

2.28.5

sanatkumāraṃ varadamapaśyadbrahmaṇaḥ sutam /
namaścakāra varadaṃ brahmaṇyaṃ brahmarūpiṇam //

2.28.6

kṛtāñjalipuṭo bhūtvā tuṣṭāva ca mahādyutiḥ /
so 'pi dṛṣṭvā manuṃ devo hṛṣṭaromābhavanmuniḥ //

2.28.7

sanatkumāraḥ prāhedaṃ ghṛṇayā ca ghṛṇānidhe /
sanatkumāra uvāca
dṛṣṭvā sarveśvarācchāntācchaṅkarānnīlalohitāt //

2.28.8

labdhvābhiṣekaṃ saṃprāpto vivakṣurvada yadyapi /
tasya tadvacanaṃ śrutvā praṇipatya kṛtāñjaliḥ //

2.28.9

vijñāpayāmāsa kathaṃ karmaṇā nirvṛtirvibho /
vaktumarhasi cāsmākaṃ karmaṇā kevalena ca //

2.28.10

jñānena nirvṛtiḥ siddhā vibho miśreṇa vā kkacit /
atha tasya vacaḥ śrutvā śrutisāravidāṃ nidhiḥ //

2.28.11

sanatkumāro bhagavānkarmaṇā nirvṛtiṅkramāt /
miśreṇa ca kramādeva kṣaṇājjñānena vai mune //

2.28.12

purāmānena coṣṭratvamagamaṃ nandinaḥ prabhoḥ /
śāpātpunaḥ prasādāddhi śivamabhyarcya śaṅkaram //

2.28.13

prasādānnandinastasya karmaṇaiva sutohyaham /
śrutvottamāṃ gatiṃ divyāmavasthāṃ prāptavānaham //

2.28.14

śivārcanaprakāreṇa śivadharmeṇa nānyathā /
rājñāṃ ṣoḍaśadānāni nandinā kathitāni ca //

2.28.15

dharmakāmārthamuktyarthaṃ karmaṇaiva mahātmanā /
tulādirohaṇādyāni śṛṇu tāni yatātatham //

2.28.16

grahaṇādiṣu kāleṣu śubhadeśeṣu śobhanam /
viṃśaddhastapramāṇena maṇḍapaṃ kūṭameva ca //

2.28.17

yathāṣṭādaśahastena kalāhastena vā punaḥ /
kṛtvā vediṃ tathā madhye navahastapramāṇataḥ //

2.28.18

aṣṭahastena vā kāryā saptahastena vā punaḥ /
dvihastā sārdhahastā vā vedikā cātiśobhanā //

2.28.19

dvādaśastaṃbhasaṃyuktā sādhuramyā bhramantikā /
parito nava kuṇḍāni caturasrāṇi kārayet //

2.28.20

endrikeśānayormadhye pradhānaṃ brahmaṇaḥ sutā /
athavā caturasraṃ ca yonyākāramataḥ param //

2.28.21

strīṇāṃ kuṇḍāni viprendrā yonyākārāṇi kārayet /
ardhacandraṃ trikoṇaṃ ca vartulaṃ kuṇḍameva ca //

2.28.22

ṣaḍasraṃ sarvato vāpi trikoṇaṃ padmasannibham /
aṣṭāsraṃ sarvamāne tu sthaṇḍilaṃ kevalaṃ tu vā //

2.28.23

caturdvārasamopetaṃ catustoraṇabhūṣitam /
diggajāṣṭakasaṃyuktaṃ darbhamālāsamāvṛtam //

2.28.24

aṣṭamaṅgalasaṃyuktaṃ vitānopariśobhitam /
tulāstaṃbhadrumāścātra bilvādīni viśeṣataḥ //

2.28.25

bilvāśvatthapalāśādyāḥ kevalaṃ khādiraṃ tu vā /
yena staṃbhaḥ kṛtaḥ pūrvaṃ tena sarvaṃ tu kārayet //

2.28.26

athavā miśramārgeṇa veṇunā vā prakalpayet /
aṣṭahastapramāṇaṃ tu hastadvayasamāyutam //

2.28.27

tulāstaṃbhasya viṣkaṃbho 'nāhatastriguṇomataḥ /
dvyaṅgulena vihīnaṃ tu suvṛttaṃ nirvraṇaṃ tathā //

2.28.28

ubhayorantaraṃ caiva ṣaḍḍhastaṃ nṛpate smṛtam /
dvoyaścaturhastakṛtamantaraṃ staṃbhayorapi //

2.28.29

ṣaḍastamantaraṃ jñeyaṃ staṃbhayorupari sthitam /
vitāstimātraṃ vistāro viṣkaṃbhastāvaduttaram //

2.28.30

staṃbhayostu pramāṇena uttaradvārasammitam /
ṣaṭtriṃśanmātrasaṃyuktaṃ vyāyāmaṃ tu tulātmakam //

2.28.31

viṣkaṃbhamaṣṭamātraṃ tu yavapaṇṭakasaṃyutam /
ṣaṭtriṃśanmātranābhaṃ syānnirmāṇādvartulaṃ śubham //

2.28.32

agre mūle ca madhye ca hemapaṭṭena bandayet /
paṭṭamadhye prakartavyamavalaṃbanakatrayam //

2.28.33

tāmreṇa ca prakartavyamavalaṃbanakatrayam /
āreṇa vā prakartavyamāyasaṃ naiva kārayet //

2.28.34

madhye cordhvamukhaṃ kāryamavalaṃbaḥ suśobhanaḥ /
raśmibhistoraṇāgre vā bandhayecca vidhānataḥ //

2.28.35

jihvāmekāṃ tulāmadhye tāreṇaṃ tu vidhīyate /
uttarasya ca madhye ca śaṅkuṃ dṛḍhamanuttamam //

2.28.36

vitānenopari cchādya dṛḍhaṃ samyakprayojayet /
saṃkoḥ suṣirasaṃpannaṃ valayaṃ kārayenmune //

2.28.37

tulāmadhye vitānena tulayālaṃbake tathā /
valayena prayoktavyaṃ kuṇḍalaṃ vāvalaṃbanam //

2.28.38

sudṛḍhaṃ ca tulāmadhye navamāṅgulamānataḥ /
paṭṭasyaiva tu vistāraṃ pañcamātrapramāṇataḥ //

2.28.39

aparau sudṛḍhau piṇḍau śubhadravyeṇa kārayet /
śikyādhastātprakartavyau pañcaprādeśa vistarau /
sahasreṇa tu kartavyau palānāṃ dhārakāvubhau //

2.28.40

śataṣṭakena vā kuryātpalaiḥ ṣaṭśatameva vā /
catustālaṃ ca kartavyo vistāromadyamastathā //

2.28.41

sārdhatritālavistāraḥ kalaśasya vidhiyate /
badhnīyātpañcapātraṃ tu trimātraṃ ṣaṭkamucyate //

2.28.42

caturdvārasamopetaṃ dvāramaṅgulamātrakam /
kuṇḍalaiśca samopetaiḥ śuklaśuddhasamanvitaiḥ //

2.28.43

kuṇḍalekuṇḍale kāryaṃ śṛṅkhalāparimaṇḍalam /
śṛṅkhalādhāravalayamavalaṃ bena yojayet //

2.28.44

prādeśaṃ vā caturmātraṃ bhūmestyaktvāvalaṃbayet /
ghaṭau puruṣamātrau tu kartavyau śobhanāvubhau //

2.28.45

tau vālukābhiḥ saṃpūrya śivaṃ tatra viniḥkṣipet /
dvihastamātramavaṭe sthāpanīyau prayatnataḥ //

2.28.46

niḥśeṣaṃ pūrayodvidvānvālukābhiḥ samantataḥ /
yena niścalatāṃ gacchettena mārgeṇa kārayet //

2.28.47

śrūyatāṃ paramaṃ guhyaṃ vedikoparimaṇḍalam /
aṣṭamāṅgulasaṃyuktaṃ maṅgalākuraśobhitam //

2.28.48

phalapuṣpasamākīrṇaṃ dhūpadīpasamanvitam /
vedimadhye prakartavyaṃ darpaṇodarasannibham //

2.28.49

ālikhenmaṇḍalaṃ pūrvaṃ caturdvārasamanvitam /
śobhopaśobhāsaṃpannaṃ karṇikākesarānvitam //

2.28.50

varṇajātisamopetaṃ pañcavarṇaṃ tu kārayet /
vajraṃ prāgantare bhāge āgneyyāṃ śaktimujjvalām //

2.28.51

ālikheddakṣiṇe daṇḍaṃ nairṛtyāṃ khaṅgamālikhet /
pāśaśca vāruṇe lekhyo dhvajaṃ vai vāyugocare //

2.28.52

kauberyāṃ tu gadā lekhyā aiśānyāṃ śūlamālikhet /
śūlasya vāmadeśena cakraṃ padmaṃ tu dakṣiṇe //

2.28.53

evaṃ likhitvā paścācca homakarmasamācaret /
pradhānahomaṃ gāyatryā svāhā śakraāya vahneye //

2.28.54

yamāya rākṣaseśāya varuṇāya ca vāyave /
kuberāyeśvarāyātha viṣṇave brahmaṇe punaḥ //

2.28.55

svāhāntaṃ praṇavenaiva hotavyaṃ vidhipūrvakam /
svaśākhāgnimukhenaiva jayādipratisaṃyutam //

2.28.56

sviṣṭāntaṃ sarvakāryāṇi kārayedvidhivattadā /
sarvahomāgrahome ca samitpālāśamucyate /
ekaviṃśatisaṃkhyātaṃ mantreṇānena homayet //

ayantaidhmaātmājātavedastene dhyasvavardhasvaceddhavardhayacāsmānprajayāpaśubhirbrahmavarcasenānnādyenasamedhayasvāhā bhūḥ svāhā bhuvaḥsvāhā svaḥ svāhā bhūrbhuvaḥ svastathaiva ca /
samiddhomaśca caruṇā ghṛtasya ca yathākramam /
śuklānnapāyasaṃ caiva mudgānnaṃ caravaḥ smṛtāḥ //

2.28.58

sahasraṃ vā tadardhaṃ vā śatamaṣṭottaraṃ tu vā //

2.28.59

agna āyūṃṣi pavasa āsuvorjamiṣaṃ ca naḥ /
arobādhasvaducchanām /
agnirṛṣiḥ pavamānaḥ pāñcajanyaḥ purohitaḥ /
tamīmahe mahāgayam /
agne pavasva svapā asme varcaḥ suvīryam /
dadhadrayiṃ mayi poṣam /
prajāpate na tvadetānyanyo viśvājātāni paritā babhūva /
yatkāmāste juhumastanno astu vayaṃ syāma patayo rayīṇām /
gāyatryā ca pradhānasya samiddhomastathaiva va /
caruṇā ca tathājyasya śakradīnāṃ ca homayet //

Commentaries (1)

Śivatosaṇī Liṅgapurāṇaṭīkā — Gaṇeśa Bhaṭṭa, Sanskrit

Linked texts (2)

Dānakhaṇḍa — Hemādri, Sanskrit
Dānamayūkha — Nīlakaṇṭha Dīkṣita 1600, Sanskrit

Lingapurana 2.28

Contents

Commentaries (1)

Linked texts (2)