Vishnupurana 128.84

128.84

tadevaṃ parameśvare niratiśayaiśvaryādiyukte mukhyo'yaṃ śabdaḥ, anyatra tu gauṇa ityāha,—‘tatre’ti | pūjyasya śreṣṭhasya padārthasya uktau yā paribhāṣā saṃketarūpagrahastatsaṃgrahaḥ | tatsamanvito'yaṃ śabdaḥ | ato nopacāreṇa pravarttate | anyatra devāda|vupacāreṇa pravarttate |
upacāre bījamāha—‘utpatti’miti |
bhagavacchabdavācyaṃ ṣāḍguṇyaṃ prakārāntareṇāha,—‘jñāne’ti | heyaiḥ prakṛtiguṇaiḥ tatkāryaiḥ karmabhistatphalaiśca vinā |
dvādaśākṣarāntargatabhagavacchabdasyārthamuktvā vāsudevaśabdasyārthamāha—‘sarvāṇī’ti | vasanād vāsanācca vāsuḥ, sādhanāt sādhuritivat | dyotanād devaḥ | vāsuścāsau devaśceti vāsudevaḥ | taduktaṃ mokṣadharme—‘vasanād devanāccaiva vāsudevantatovidu’riti |
janakādayo'pi bhagavannāmālocananiṣṭhayaiva brahmajñānaṃ prāptā iti darśayannāha—‘khāṇḍikye’ti ṣaḍbhiḥ |
bhūteṣu so'ntariti vāsuśabdo vyākhyātaḥ | ‘dhātā vidhāte’tyādinā devaśabdo diverdhātoḥ anekārthaprapañcena vyākhyāta iti jñeyam |
bhuvanāntarāle yadasti, tatsarvaṃ tenāstṛtaṃ channaṃ vyāptamiti yāvat |