Pranatoshini 6.4.100

6.4.100

p. 791) samabhyaset | ṣaṭkarmayogamāpnoti pavanābhyāsatatparaḥ |
brahmādayo'pi tridaśāḥ pavanābhyāsatatparāḥ | ataḥ siddhiṃ
gatāste ca tasmātpavanamabhyaset | yāvadbaddho maruddehe
tāvaccittaṃ nirāśayam | trāṭakañcedbhruvormadhye
tāvatkālabhayaṃ kutaḥ | vidhivat prāṇasaṃrodhānnāḍīcakre
viśoṣite | suṣumnāvadanaṃ bhittvā mukhādviśati mārutaḥ | mārute
madhyasañcāre manaḥsthairyaṃ prajāyate | yo manaḥsusthirībhāvaḥ
saivāvasthā manonmanī | tatsiddhaye viśeṣajñaścitrān kurvīta
kumbhakān | vicitrakumbhakābhyāsādvicitrāṃ siddhimāpnuyāt ||
atha trāṭakam || nirīkṣenniścaladṛśā sūkṣmalakṣyaṃ prayatnataḥ |
aśrusampātaparyantaṃ trāṭakaṃ tanmaheśvari ! | yatnatastrāṭakaṃ
gopyaṃ tathā hāṭakapeṭikā || vicitrakumbhakāstu |
sūryabhedanamuḍḍākhyaṃ tamā śītkāraśītalī | bhastrikā
bhrāmarī mūrcchā plāvanī sapta kumbhakāḥ | ādau sūryabhedanam
|| āsane sukhade yogī baddhvā muktāsanaṃ tataḥ | dakṣanāḍyā
samākṛṣya vahnisthaṃ pavanaṃ śanaiḥ | ākeśāgrānnakhāgrādvā
nirodhāvadhi kumbhayet | tataḥ śanaiḥ savyanāḍyā recayet pavanaṃ
sudhīḥ || asya phalam || kapālaśodhanaṃ vātadoṣaghnaṃ
kṛmidoṣaham | punaḥ punaridaṃ kāryaṃ sūryabhedanamuttamam || 1 ||