Taittirīya Āraṇyaka 2.11

2.11

15 brahmayajñena yakṣyamāṇaḥ prācyāṃ diśi grāmādachadirdarśa udīcyāṃ prāgudīcyāṃ vodita āditye dakṣiṇata upavīyopaviśya hastāvavanijya trirācāmeddviḥ parimṛjya sakṛdupaspṛśya śiraścakṣuṣī nāsike śrotre hṛdayamālabhya yattrirācāmati tena ṛcaḥ prīṇāti yaddviḥ parimṛjati tena yajūṃṣi yathsakṛdupaspṛśati tena sāmāni yathsavyaṃ pāṇiṃ pādau prokṣati yacchiraścakṣuṣī nāsike śrotre hṛdayamālabhate tenātharvāṃgiraso brāhmaṇānītihāsānpurāṇāni kalpāngāthā nārāśaṃsīḥ prīṇāti darbhāṇāṃ mahadupastīṟyopasthaṃ kṛtvā prāṅāsīnaḥ svādhyāyamadhīyītāpāṃ vā eṣa oṣadhīnāṃ raso yaddarbhāḥ sarasameva brahma kurute dakṣiṇottarau pāṇī pādau kṛtvā sapavitrāvomiti pratipadyata etadvai yajustrayīṃ vidyāṃ pratyeṣā vāgetatparamamakṣaraṃ tadetadṛcā'bhyukta mṛco akṣare parame vyoman yasmindevā adhi viśve niṣeduryastanna veda kimṛcā kariṣyati ya ittadvidusta ime samāsata iti trīneva prāyuṅkta bhūrbhuvassvarityāhaitadvai vācassatyaṃ yadeva vācassatyaṃ tatprāyuṅktātha sāvitrīṃ gāyatrīṃ triranvāha paccho'rdharcaśo'navānaṃ savitā śriyaḥ prasavitā śriyamevāpnotyatho prajñātayaiva pratipadā chandāṃsi pratipadyate ||