Taittirīya Āraṇyaka 5.2
Taittirīyāraṇyaka (complete text) 5.2
- Language
- Sanskrit
5.2
yājyāyai na juhuyādaviśadveṇuḥ śāntyai paṅktirādhasamityāha harati dihanti parākramatāviśatprajāyamānānāṃ sṛjati śantvāyāṣṭau ca ||
5.2.p1
21 pariśrite karoti | brahmavarcasasya parigṛhītyai | na kurvannabhiprāṇyāt | yatkurvannabhiprāṇyāt | prāṇāñchucā'rpayet |
apahāya prāṇiti | prāṇānāṃ gopīthāya | na pravargyaṃ cādityaṃ cāntareyāt | yadantareyāt | duścarmā syāt ||
5.2.p2
22 tasmānnāntarāyyam | ātmano gopīthāya | veṇunā karoti | tejo vai veṇuḥ |
tejaḥ pravargyaḥ | tejasaiva tejassamardhayati | makhasya śiro'sītyāha |
yajño vai makhaḥ | tasyaitacchiraḥ | yatpravargyaḥ ||
5.2.p3
23 tasmādevamāha | yajñasya pade stha ityāha | yajñasya hyete pade | atho pratiṣṭhityai | gāyatreṇa tvā chandasā karomītyāha |
chandobhirevainaṃ karoti | tryuddhiṃ karoti | traya ime lokāḥ | eṣāṃ lokānāmāptyai | chandobhiḥ karoti ||
5.2.p4
24 vīryaṃ vai chandāṃsi | vīryeṇaivainaṃ karoti | yajuṣā bilaṃ karoti vyāvṛttyai | iyantaṃ karoti | prajāpatinā yajñamukhena saṃmitam |
iyantaṃ karoti | yajñaparuṣā saṃmitam | iyantaṃ karoti | etāvadvai puruṣe vīryam | vīryasaṃmitam ||
5.2.p5
25 aparimitaṃ karoti | aparimitasyāvaruddhyai | parigrīvaṃ karoti dhṛtyai | sūryasya harasā śrāyetyāha | yathā yajurevaitat |
aśvaśakena dhūpayati | prājāpatyo vā aśvassayonitvāya | vṛṣṇo aśvasya niṣpadasītyāha | asau vā ādityo vṛṣāśvaḥ | tasya chandāṃsi niṣpat ||
5.2.p6
26 chandobhirevainaṃ dhūpayati | arciṣe tvā śociṣe tvetyāha | teja evāsmindadhāti | vāruṇo'bhīddhaḥ | maitriyopaiti śāntyai | siddhyai tvetyāha | yathā yajurevaitat | devastvā savitodvapatvityāha |
savitṛprasūta evainaṃ brahmaṇā devatābhirudvapati | apadyamānaḥ pṛthivyāmāśā diśa āpṛṇetyāha ||
5.2.p7
27 tasmādagnissarvā diśo'nuvibhāti | uttiṣṭha bṛhanbhavordhvastiṣṭha dhruvastvamityāha pratiṣṭhityai | īśvaro vā eṣo'ndho bhavitoḥ |
yaḥ pravargyamanvīkṣate | sūryasya tvā cakṣuṣā'nvīkṣa ityāha |
cakṣuṣo gopīthāya | ṛjave tvā sādhave tvā sukṣityai tvā bhūtyai tvetyāha | iyaṃ vā ṛjuḥ | antarikṣaṃ sādhu | asau sukṣitiḥ ||
5.2.p8
28 diśo bhūtiḥ | imānevāsmai lokānkalpayati | atho pratiṣṭhityai |
idamahamamumāmuṣyāyaṇaṃ viśā paśubhirbrahmavarcasena paryūhāmītyāha | viśaivainaṃ paśubhirbrahmavarcasena paryūhati | viśeti rājanyasya brūyāt | viśaivainaṃ paryūhati | paśubhiriti vaiśyasya | paśubhirevainaṃ paryūhati | asuryaṃ pātramanācchṛṇṇam ||
5.2.p9
29 ācchṛṇatti | devatrā'kaḥ | ajakṣīreṇācchṛṇatti | paramaṃ vā etatpayaḥ | yadajakṣīram | parameṇaivainaṃ payasā''cchṛṇatti | yajuṣā vyāvṛttyai | chandobhirācchṛṇatti | chandobhirvā eṣa kriyate | chandobhireva chandāgsyācchṛṇatti | chṛndhi vācamityāha |
vācamevāvarundhe | chṛndhyūrjamityāha | ūrjamevāvarundhe | chṛndhi havirityāha | havirevākaḥ | deva puraścara saghyāsaṃ tvetyāha |
yathā yajurevaitat ||
Commentaries (2)
- Taittirīyāraṇyakabhāṣya (Sāyaṇa) — Sāyaṇa, Sanskrit
- Vedārthaprakāśa — Sāyaṇa alias Mādhava, Sanskrit
Other recensions (1)
- Taittirīyāraṇyaka — Sanskrit
Linked texts (3)
- Yajurveda — Sanskrit
- Taittirīyāruṇa — Sanskrit
- Cittiprapāṭhaka — Sanskrit