Taittirīya Āraṇyaka 4.1.1

4.1.1

námo vācé yā́ coditā́ yā́ cā́nuditā tásyai vācé námo námo vācé námo vācáspátaye náma ṛ́ṣibhyo mantrakṛ́dbhyo mántrapatibhyo mā́ mā́m ṛ́ṣayo mantrakṛ́to mantrapátayaḥ párā dur mā́ 'hám ṛ́ṣīn mantrakṛ́to mantrapátīn párā dām \
vaiśvadevī́ṃ vaiśvadevī́ṃ vā́cam udyāsam̐ śivā́m ádastāṃ júṣṭāṃ devébhyaḥ \
śárma me dyáuḥ śárma pṛthivī́ śárma víśvam idáṃ jágat \
śárma candráś ca sū́ryaś ca śárma brahmaprajāpatī́ \
bhūtáṃ vadiṣye bhúvanaṃ vadiṣye téjo vadiṣye yáśo vadiṣye tápo vadiṣye bráhma vadiṣye satyáṃ vadiṣye \
tásmā ahám idám upastáraṇam úpastṛṇa upastáraṇaṃ me prajā́yai paśūnā́ṃ bhūyād upastáraṇam aháṃ prajāyai paśūnā́ṃ bhūyāsam \
prā́ṇāpānau mṛtyór mā pātaṃ prā́ṇāpānau mā́ mā hāsiṣṭam \
mádhu maniṣye mádhu janiṣye mádhu vakṣyāmi mádhu vadiṣyāmi mádhumatīṃ devébhyo vā́cam udyāsam̐ śuśrūṣéṇyāṃ manuṣyèbhyas táṃ mā devā́ avantu śobhā́yai pitáró 'nu madantu \
Oṃ śā́ntiḥ śā́ntiḥ śā́ntiḥ \