Gopathabrahmana 2.2.2

2.2.2

pañcadhā vai devā vyudakrāmann agnir vasubhiḥ somo rudrair indro marudbhir varuṇa ādityair bṛhaspatir viśvair devais
te devā abruvann asurebhyo vā idaṃ bhrātṛvyebhyo radhyāmo yan mitho vipriyāḥ smaḥ_
yā na imāḥ priyās tanvas tāḥ samavadyāmahā iti
tāḥ samavādyanta
tābhyaḥ sa nirṛcchādyo naḥ prathamo 'nyo 'nyasmai druhyād iti
yat tanvaḥ samavādyanta tat tānūnaptrasya tānūnaptratvam_
tato devā abhavan parāsurās
tasmād yaḥ satānūnaptriṇāṃ prathamo druhyati sa ārtim ārchati
yat tānūnaptraṃ samavadyati bhrātṛvyābhibhūtyai
bhavaty ātmanā parāsyāpriyo bhrātṛvyo bhavati || 2 ||