Gopathabrahmana 2.4.16

2.4.16

atha yad aindrābārhaspatyaṃ brāhmaṇācchaṃsina ukthaṃ bhavati_<indraś ca somaṃ pibataṃ bṛhaspate 'smin yajñe mandasānā vṛṣaṇvasū [ṚV 4.50.10]> ity ṛcābhyanūktam_
madvad dhi tṛtīyasavanam_
<vayam u tvām apūrvya [ṚV 8.21.1, ŚS 20.14.1/20.62.1]> <yo na idamidaṃ purā [ṚV 8.21.9, ŚS 20.14.3/20.62.3, VaitS 25.3]>_iti brāhmaṇācchaṃsina stotriyānurūpau
<pra maṃhiṣṭhāya bṛhate bṛhadraye [ṚV 1.57.1, ŚS 20.15.1]>_ity ukthamukham
aindrājāgatam_
jāgatāḥ paśavaḥ
paśūnām āptyai
jāgatam u vai tṛtīyasavanam_
tṛtīyasavanasya rūpam
<udapruto na vayo rakṣamāṇāḥ [ṚV 10.68.1, ŚS 20.16.1]>_iti bārhaspatyaṃ sāṃśaṃsikam
ahaṃ ceti bṛhaspatir abravīt_
devatayoḥ saṃśaṃsāyanatiśaṃsāya_
<acchā ma indraṃ matayaḥ svarvidaḥ [ṚV 10.43.1, ŚS 20.17.1]>_iti paryāsa aindrābārhaspatyaḥ_
aindrābārhaspatyam asyaitan nityam uktham_
tad etat svasminn āyatane svasyāṃ pratiṣṭhāyāṃ pratiṣṭhāpayati
dvandvaṃ vā etā devatā bhūtvā vyajayanta
vijityā eva_
atho dvandvasyaiva mithunasya prajātyai
<bṛhaspatir naḥ pari pātu paścāt [ṚV 10.42/43/44.11a, PS 15.11.1/16.8.11a, ŚS 7.51.1/20.17.11/20.89.11/20.94.11a]>_ity aindrābārhaspatyā paridadhāti_
indrābṛhaspatyor eva yajñaṃ pratiṣṭhāpayati_
<utottarasmād adharād aghāyor indraḥ purastād uta madhyato naḥ sakhā sakhibhyo varivaḥ kṛṇotu [ṚV 10.42/43/44.11bcd, PS 15.11.1/16.8.11bcd, ŚS 7.51.1/20.17.11/20.89.11/20.94.11bcd]>_iti
sarvābhya eva digbhya āśiṣam āśāste nārtvī
yaṃ kāmaṃ kāmayate so 'smai kāmaḥ samṛdhyate ya evaṃ veda yaś caivaṃvidvān brāhmaṇācchaṃsy etayā paridadhāti [ed. etasyā, corr. Patyal; ed. brāhmaṇācchaṃy]