Gopathabrahmana 2.4.17

2.4.17

atha yad aindrāvaiṣṇavam acchāvākasyokthaṃ bhavati_<indrāviṣṇū madapatī madānām ā somaṃ yātaṃ draviṇo dadhānā [ṚV 6.69.3]>_ity ṛcābhyanūktam_ [ed. acchāvākasyoktaṃ]
madvad dhi tṛtīyasavanam
<adhā hīndra girvaṇaḥ [ṚV 8.98.7]>_<iyaṃ ta indra girvaṇaḥ [ṚV 8.13.4]>_ity acchāvākasya stotriyānurūpau_
<ṛtur janitrī tasyā apas pari [ṚV 2.13.1]>_ity ukthamukham_
tasyoktaṃ brāhmaṇam_
<nū marto dayate saniṣyan [ṚV 7.100.1]>_iti vaiṣṇavaṃ sāṃśaṃsikam [ed. sāṃśaṃsikaṃm]
ahaṃ ceti viṣṇur abravīt_
devatayoḥ saṃśaṃsāyānatiśaṃsāya
<saṃ vāṃ karmaṇā sam iṣā hinomi [ṚV 6.69.1]>_iti paryāsa aindrāvaiṣṇavaḥ_
aindrāvaiṣṇavam asyaitan nityam uktham_ [ed. ukhaṃ]
tad etat svasminn āyatane svasyāṃ pratiṣṭhāyāṃ pratiṣṭhāpayati
dvandvaṃ vā etā devatā bhūtvā vyajayanta
vijityā eva_
atho dvandvasyaiva mithunasya prajātyai_
<ubhā jigyathur na parā jayethe [ṚV 6.69.8, PS 20.16.3, ŚS 7.44.1]> ity aindrāvaiṣṇavyarcā paridadhāti_
indrāviṣṇor eva yajñaṃ pratiṣṭhāpayati_
<indrāviṣṇū pibataṃ madhvo asya [ṚV 6.69.7]>_iti yajati_
ete eva tad devate yathābhāgaṃ prīṇāti
vaṣaṭkṛtyānuvaṣaṭkaroti
praty evābhimṛśante
nāpyāyayanti
na hy anārāśaṃsāḥ sīdanti || 17 ||