Gopathabrahmana 2.4.2

2.4.2

<taṃ vo dasmam ṛtīṣahaṃ [ṚV 8.88.1, ŚS 20.9.1]> <tat tvā yāmi suvīryam [ṚV 8.3.9, ŚS 20.9.4]> iti brāhmaṇācchaṃsina stotriyānurūpau_
<ud u tye madhumattamā giraḥ [ṚV 8.3.15, ŚS 20.59.1]>_iti bārhataḥ pragāthaḥ
paśavo vai pragāthaḥ
paśavaḥ svaraḥ
paśūnām āptyai_
ato madhyaṃ vai sarveṣāṃ chandasāṃ bṛhatī
madhyaṃ mādhyaṃdinaṃ savanānām_
tan madhyenaiva madhyaṃ samardhayati_
<indraḥ pūrbhid ātirad dāsam arkaiḥ [ṚV 3.34.1, ŚS 20.11.1]>_ity ukthamukham
<ud u brahmāṇy airata śravasyā [ṚV 7.23.1, ŚS 20.12.1]>_iti paryāsaḥ_
<eved indraṃ vṛṣaṇaṃ vajrabāhum [ṚV 7.23.6a, ŚS 20.12.6a]> iti paridadhāti
<vasiṣṭhāso abhy arcanty arkaiḥ [ṚV 7.26.6b, ŚS 20.12.6b]>_iti_
annaṃ vā arkaḥ_
annādyam evāsmai tat paridadhāti
<sa na stuto vīravad dhātu gomat [ṚV 7.26.6c, ŚS 20.12.6c]>_iti
annaṃ vā arkaḥ_iti
prajāṃ caivāsmai tat paśūṃś cāśāste
<yūyaṃ pāta svastibhiḥ sadā naḥ [ṚV 7.26.6d, ŚS 20.12.6d]>_iti svastimatī rūpasamṛddhā
etad vai yajñasya samṛddhaṃ yad rūpasamṛddhaṃ yat karma kriyamāṇam ṛgyajurvābhivadati
svasti tasya yajñasya pāram aśnute ya evaṃ veda yaś caivaṃvidvān brāhmaṇācchaṃsy etayā paridadhāti_
<ṛjīṣī vajrī vṛṣabhas turāṣāṭ [ṚV 5.40.4, ŚS 20.12.7]>_iti yajati_ [ed. ṛjiṣī, corrected p. 302]
etām eva tad devatāṃ yathābhāgaṃ prīṇāti
vaṣaṭkṛtyānuvaṣaṭkaroti