Mantrabrahmana 2.26
Chāndogyamantrabhāṣya 2.26
- Language
- Sanskrit
2.26
ityuktārtho⁵ grahahome (2, 17)
gāyatrāstisraḥ [triṣṭubhakā] indradevatyāḥ śāntikarmaṇi viniyuktāḥ mahāvāmadevadṛṣṭāḥ | he ‘indra’ ! ‘kaḥ’ rasaḥ ‘tvā’ tvāṃ ‘matsat’ mattaṃ karoti | kasya rasaḥ ? ‘andhasaḥ’ andhasya somasya iti yāvat | kimbhūto rasaḥ ? ‘satyaḥ’ somayāge kriyamāṇe avaśyambhāvī | punaḥ kimbhūtaḥ ? ‘madānāṃ’ surādīnāṃ madhye ‘maṃhiṣṭhaḥ’ atiśayena madajanakaḥ | yena madena mattaḥ tvaṃ ‘vasu’ vasūni dhanāni ‘āruje’ bhañjayasi | kimbhūtāni dhanāni ? ‘dṛr̤hā cit’ dṛr̤hānyapi suvarṇaprabhṛtīni dhanāni yāgakartṛbhyo dātuṃ bhañjayasi | tvayā kathite vayaṃ tat anatiṣṭhāmaḥ | maṃhiṣṭhaḥ iti “maṃhi vṛddhau” tṛjantāt “tuśchandasi” (pā0 5,3,56) iti iṣṭhan “turiṣṭhemeyaḥsu” (pā0 6,4,154) iti tṛco lopaḥ | matsat iti “madī harṣe” ṇyantāt leṭ, tip, “sibbahulaṃ leṭi” (pā0 3,1, 34) iti sip, ṇilopaḥ | dṛr̤hā iti “śeśchandasi bahulam” (pā0 6,1,70) iti śasaḥ śelopaḥ | āruje iti ‘tiṅāṃ tiṅo bhavanti’ iti sip-sthāne uttamaikavacanamiṭ | vasu iti “supāṃ suluka”— (pā0 7,1,36) iti śaso luk || 27 he indra ! ‘naḥ’ asmākaṃ, tathā ‘sakhīnāṃ’ mitrāṇāṃ, tathā ‘jaritṛṇām, ‘avitā’ pālayitā ‘bhavasi’ bhava | ‘abhī’ ‘ābhimukhyena’, tathā ‘su’ suṣṭhu yathā syāt | kimbhūtaḥ san ? ‘śataṃ’ svayaṃ śatadhā bhūtvā ityarthaḥ | kimartham avitā bhava ? ‘ūtaye’ bahuprakārarakṣaṇāya |
'naḥ' asmabhyam 'indraḥ' 'svasti' śāntiṃ 'dadhātu' | kimbhūtaḥ ? 'vṛddhaśravāḥ' vṛddhavākyakārī | tathā 'pūṣā', 'viśvavedāḥ' sarvajñaḥ, tathā 'tārkṣyaḥ', 'ariṣṭanemiḥ' avyāhatagatiprasaraḥ, tathā 'bṛhaspatiḥ' | svasti naḥ dadhātu | “etāścatasro gātavyā vā” iti gṛhyam
iti chāndogyamantrabhāṣye dvitīyaṃ khaṇḍam |
Other recensions (1)
- Bhattacharyya2003 — Sanskrit
Linked texts (1)
- Chāndogyabrāhmaṇa — Sanskrit