Pañcaviṃśa (Tāṇḍya Mahā) Brāhmaṇa 56

56

(PB 5.10.1) ā vā ete saṃvvatsaraṃ pyāyayanti ya utsṛjanti
(PB 5.10.2) yathā vai dṛtir ādhmāta evaṃ saṃvvatsaro 'nutsṛṣṭo yan notsṛjeyur amehena pramāyukāḥ syuḥ
(PB 5.10.3) prāṇo vai saṃvvatsara udānā māsā yad utsṛjanti prāṇa evodānān dadhati yo dīkṣitaḥ pramīyate yā saṃvvatsarasyānutsṛṣṭasya śuk sā tam ṛcchati
(PB 5.10.4) tad āhur utsṛjyā3ṃ notsṛjyā3m iti
(PB 5.10.5) yady utsṛjeyur ukthāny utsṛjeyus tad evotsṛṣṭaṃ tad anutsṛṣṭam
(PB 5.10.6) atho khalv āhur ekatrikaṃ kāryaṃ tad eva sākṣād utsṛṣṭam abhyutṣuṇvanti
(PB 5.10.7) chidro vā eteṣāṃ saṃvvatsara ity āhur ye stomam utsṛjantīti
(PB 5.10.8) paśum ālabhante stomam eva tad ālabhante stomo hi paśuḥ
(PB 5.10.9) śva utsṛṣṭāḥ sma iti vatsān apākurvanti prātaḥ paśum ālabhante tasya vapayā pracaranti tatas savanīyenāṣṭākapālena tata āgneyenāṣṭākapālena tato dadhnaindreṇa tataś caruṇā vaiśvadevena tat prātaḥsavanaṃ saṃtiṣṭhante
(PB 5.10.10) tataḥ paśupuroḍāśenaikādaśakapālena tataḥ savanīyenaikādaśakapālena tato marutvatīyenaikādaśakapālena tataś caruṇaindreṇa tan mādhyandinaṃ savanaṃ saṃtiṣṭhante
(PB 5.10.11) paśunā pracaranti tataḥ savanīyena dvādaśakapālena tato vaiśvadevena dvādaśakapālena tataś caruṇāgnimārutena tat tṛtīyaṃ savanaṃ saṃtiṣṭhante
(PB 5.10.12) pṛṣadājyena pracarya patnīs saṃyājayanti