Taittiriyabrahmana 1.1.8
Taittirīyabrāhmaṇa 1.1.8
- Language
- Sanskrit
1.1.8.1
imé vā́ eté lokā́ agnáyaḥ /
té yád ávyāvṛttā ādhīyéran /
śocáyeyur yájamānam /
gharmáḥ śíra íti gā́rhapatyam ā́dadhāti /
vā́taḥ prāṇá íty anvāhāryapácanam /
arkáś cákṣur íty āhavanī́yam /
ténaiváinān vyā́vartayati /
táthā ná śocayanti yájamānam /
rathantarám abhígāyate gā́rhapatya ādhīyámāne /
rā́thantaro vā́ ayáṃ lokáḥ //
1.1.8.2
asmínn eváinaṃ loké prátiṣṭhitam ā́dhatte /
vāmadevyám abhígāyata uddhriyámāṇe /
antárikṣaṃ vái vāmadevyám /
antárikṣa eváinaṃ prátiṣṭhitam ā́dhatte /
átho śā́ntir vái vāmadevyám /
śāntám eváinaṃ paśavyàm uddharate /
bṛhád abhígāyata āhavanī́ya ādhīyámāne /
bā́rhato vā́ asáu lokáḥ /
amúṣminn eváinaṃ loké prátiṣṭhitam ā́dhatte /
prajā́patir agním asṛjata //
1.1.8.3
só 'śvo vā́ro bhūtvā́ párāṅ ait /
táṃ vāravantī́yena_avārayata /
tád vāravantī́yasya vāravantīyatvám /
śyaiténa śyetī́ akuruta /
tác chyaitásya śyaitatvám /
yád vāravantī́yam abhigā́yate /
vārayitvā́_eváinaṃ prátiṣṭhitam ā́dhatte /
śyaiténa śyetī́ kurute /
gharmáḥ śíra íti gā́rhapatyam ā́dadhāti /
sáśīrṣāṇam eváinam ā́dhatte //
1.1.8.4
úpa_enam úttaro yajñó namati /
rudró vā́ eṣáḥ /
yád agníḥ /
sá ādhīyámāna īśvaró yájamānasya paśū́n hím̐sitoḥ /
sáṃpriyaḥ paśúbhir bhuvad íty āha /
paśúbhir eváinam̐ sáṃpriyaṃ karoti /
paśūnā́m áhim̐sāyai /
chardís tokā́ya tánayāya yaccha_íty āha /
āśíṣam eváitām āśāste /
vā́taḥ prāṇá íty anvāhāryapácanam //
1.1.8.5
sáprāṇam eváinam ā́dhatte /
svaditáṃ tokā́ya tánayāya pitúṃ pacéty āha /
ánnam evā́smai svadayati /
prā́cīm ánu pradíśaṃ préhi vidvā́n íty āha /
víbhaktir eváinayoḥ sā́ /
átho nā́nāvīryāv eváinau kurute /
ū́rjaṃ no dhehi dvipáde cátuṣpada íty āha /
āśíṣam eváitā́m ā́śāste /
arkáś cákṣur íty āhavanī́yam /
arkó vái devā́nām ánnam //
1.1.8.6
ánnam evá_ávarundhe /
téna me dīdihi_íty āha /
sámindha eváinam /
ānaśé vyā̀naśa íti trír údiṅgayati /
tráya imé lokā́ḥ /
eṣv èváinaṃ lokéṣu prátiṣṭhitam ā́dhatte /
tát táthā ná kāryàm /
vī́ṅgitam ápratiṣṭhitam ā́dadhīta /
uddhṛ́tya_evá_ā́dhāya_abhimántriyaḥ /
ávīṅgitam eváinaṃ prátiṣṭhitam ā́dhatte /
virā́ṭ ca svarā́ṭ ca yā́s te agne śivā́s tanúvas tā́bhis tvā_ā́dadha íty āha /
etā́ vā́ agnéḥ śivā́s tanúvaḥ /
tā́bhir eváinam̐ sámardhayati /
yā́s te agne ghorā́s tanúvas tā́bhir amúṃ gacchéti brūyād yáṃ dviṣyā́t /
tā́bhir eváinaṃ párābhāvayati //
Commentaries (5)
- Jñānayajña on the Taittirīya Brāhmaṇa (Bhaṭṭabhāskara) — Bhaṭṭabhāskara Miśra, Sanskrit
- Taittirīyabrāhmaṇabhāṣya (Sāyaṇa) — Sāyaṇa, Sanskrit
- Taittirīyabrāhmaṇakāṭhakabhāṣya — Bhaṭṭa Bhāskara Miśra Cikāeḍamaṇḍana, Sanskrit
- Taittirīyabrāhmaṇaṭīkā — Sanskrit
- Yajurbrahmaṇabhāṣya — Sāyaṇācārya, Sanskrit
Discussed in (3)
- History of Dharmaśāstra (Ancient and Mediaeval Religious and Civil Law in India) — Kane 1930, English
- A Vedic Concordance — Bloomfield 1906, English
- Altindische Grammatik — Wackernagel & Debrunner 1896, German