Pramāṇa · Search · About · API

Taittiriyabrahmana 1.1.9

Taittirīyabrāhmaṇa 1.1.9

Language
Sanskrit

1.1.9.1

śamīgarbhā́d agníṃ manthati /
eṣā́ vā́ agnér yajñíyā tanū́ḥ /
tā́m evā́smai janayati /
áditiḥ putrákāmā /
sādhyébhyo devébhyo brahmaudanám apacat /
tásyā ucchéṣaṇam adaduḥ /
tát prā́śnāt /
sā́ réto 'dhatta /
tásyai dhātā́ ca_aryamā́ ca_ajāyetām /
sā́ dvitī́yam apacat //

1.1.9.2

tásyā ucchéṣaṇam adaduḥ /
tát prā́śnāt /
sā́ réto 'dhatta tásyai mitráś ca váruṇaś ca_ajāyetām /
sā́ tṛtī́yam apacat /
tásyā ucchéṣaṇam adaduḥ /
tát prā́śnāt /
sā́ réro 'dhatta /
tásyā ám̐śaś ca bhágaś ca_ajāyetām /
sā́ caturthám apacat //

1.1.9.3

tásyā ucchéṣaṇam adaduḥ /
tát prā́śnāt /
sā́ réto 'dhatta /
tásyā índraś ca vívasvām̐ś cājāyetām /
brahmaudanáṃ pacati /
réta evá tád dadhāti /
prā́śnanti brāhmaṇā́ odanám /
yád ā́jyam ucchíṣyate /
téna samídho 'bhyájya_ā́dadhāti /
ucchéṣaṇād vā́ áditī réto 'dhatta //

1.1.9.4

ucchéṣaṇād evá tád réto dhatte /
ásthi vā́ etát /
yát samídhaḥ /
etád rétaḥ /
yád ā́jyam /
yád ā́jyena samídho 'bhyájya_ādádhāti /
ásthy evá tád rétasi dadhāti /
tisrá ā́dadhāti mithunatvā́ya /
íyatīr bhavanti /
prajā́patinā yajñamukhéna sáṃmitāḥ //

1.1.9.5

íyatīr bhavanti /
yajñaparúṣā sáṃmitāḥ /
íyatīr bhavanti /
etā́vad vái púruṣe vīryàm /
vī̀ryasaṃmitāḥ /
ārdrā́ bhavanti /
ārdrám iva hí rétaḥ sicyáte /
cítriyasya_aśvatthásya_ā́dadhāti /
citrám evá bhavati /
ghṛtávatībhir ā́dadhāti //

1.1.9.6

etád vā́ agnéḥ priyáṃ dhā́ma /
yád ghṛtám /
priyéṇaiváinaṃ dhā́mnā sámardhayati /
átho téjasā /
gāyatrī́bhir brāhmaṇásya_ā́dadhyāt /
gāyatrácchandā vái brāhmaṇáḥ /
svásya chándasaḥ pratyayanastvā́ya /
triṣṭúgbhī rājanyàsya /
triṣṭúpchandā vái rājanyàḥ /
svásya chándasaḥ pratyayanastvā́ya //

1.1.9.7

jágatībhir váiśyasya /
jágatīchandā vái váiśyaḥ /
svásya chándasaḥ pratyayanastvā́ya /
tám̐ saṃvatsaráṃ gopāyet /
saṃvatsarám̐ hí réto hitáṃ várdhate /
yády enam̐ saṃvatsaré nópanámet /
samídhaḥ púnar ā́dadhyāt /
réta evá tád dhitáṃ várdhamānam eti /
ná mām̐sám aśnīyāt /
ná stríyam upeyāt //

1.1.9.8

yán mām̐sám aśnīyā́t /
yát stríyam upeyā́t /
nírvīryaḥ syāt /
ná_enam agnír úpanamet /
śvá ādhāsyámāno brahmaudanáṃ pacati /
ādityā́ vā́ itá uttamā́ḥ suvargáṃ lokám āyann /
té vā́ itó yántaṃ prátinudante /
eté khálu vā́vá_ā́dityāḥ /
yád brāhmaṇā́ḥ /
táir evá saṃtváṃ gacchati //

1.1.9.9

ná_enaṃ prátinudante /
brahmavādíno vadanti /
kvā̀ sáḥ /
agníḥ kāryàḥ /
yò 'smai prajā́ṃ paśū́n prajanáyati_íti /
śálkais tā́m̐ rā́trim agním indhīta /
tásminn upavyuṣám aráṇī níṣṭapet /
yáthā_ṛṣabhā́ya vāśitā́ nyāvicchāyáti vāsitāṃ nyāvichāyáti, /
tadṛ́g evá tát /
apodū́hya bhásmāgníṃ manthati //

1.1.9.10

sáivá sā́_agnéḥ sáṃtatiḥ /
táṃ mathitvā́ prā́ñcam úddharati /
saṃvatsarám evá tád réto hitáṃ prájanayati /
ánāhitas tásya_agnír íty āhuḥ /
yáḥ samídhó 'nādhāya_agním ādhatta íti /
tā́ḥ saṃvatsaré purástād ā́dadhyāt /
saṃvatsarā́d eváinam avarúdhya_ā́dhatte /
yádi saṃvatsaré nā́dadhyā́t /
dvādaśyā̀ṃ purástād ā́dadhyāt saṃvatsarápratimā vái dvā́daśa rā́trayaḥ /
saṃvatsarám evā́sya_ā́hitā bhavanti /
yádi dvādaśyā̀ṃ ná_ā́dadhyā́t /
tryahé purástād ā́dadhyāt /
ā́hitā evā́sya bhavanti //

Commentaries (5)

Linked texts (2)

Discussed in (9)