Pramāṇa · Search · About · API

Taittiriyabrahmana 2.8

Taittirīyabrāhmaṇa 2.8

Language
Sanskrit

Contents

2.8.1.1

pī́vonnām̐ rayivṛ́dhaḥ sumedhā́ḥ /
śvetáḥ siṣakti niyútām abhiśrī́ḥ /
té vāyáve sámanaso vítasthuḥ /
víśvā_ít_ náraḥ svapatyā́ni cakruḥ /
rāyé 'nú yáṃ jajñátū ródasī ubhé /
rāyé devī́ dhiṣáṇā dhāti devám /
ádhā vāyúṃ niyútaḥ saścata svā́ḥ /
utá śvetáṃ vásudhitiṃ nireké /
ā́ vāyo, prá yā́bhiḥ /
prá vāyúm ácchā bṛhatī́ manīṣā́ //

2.8.1.2

bṛhádrayiṃ viśvávārām̐ rathaprā́m /
dyutádyāmā niyútaḥ pátyamānaḥ /
kavíḥ kavím iyakṣasi prayajyo /
ā́ no niyúdbhiḥ śatínībhir adhvarám /
sahasríṇībhir úpa yāhi yajñám /
vā́yo asmín havíṣi mādayasva /
yūyáṃ pāta svastíbhiḥ sádā naḥ /
prájāpate ná tvád etā́ny anyáḥ /
víśvā jātā́ni pári tā́ babhūva /
yátkāmās te juhumás tán no astu //

2.8.1.3

vayám̐ syāma pátayo rayīṇā́m /
rayīṇā́ṃ pátiṃ yajatáṃ bṛhántam /
asmín bháre nṛ́tamaṃ vā́jasātau /
prajā́patiṃ prathamajā́m ṛtásya /
yájāma devám ádhi no bravītu /
prájāpate tváṃ nidhipā́ḥ purāṇáḥ /
devā́nāṃ pitā́ janitā́ prajā́nām /
pátir víśvasya jágataḥ paraspā́ḥ /
havír no deva vihavé juṣasva /
táva_imé lokā́ḥ pradíśo díśaś ca //

2.8.1.4

parāváto niváta udvátaś ca /
prájāpate viśvasṛ́j jīvádhanya idáṃ no deva /
prátiharya havyám /
prajā́patiṃ prathamáṃ yajñíyānām /
devā́nām ágre yajatáṃ yajadhvam /
sá no dadātu dráviṇam̐ suvī́ryam /
rāyás póṣaṃ víṣyatu nā́bhim asme /
yó rāyá ī́śe śatadāyá ukthyàḥ /
yáḥ paśūnā́m̐ rakṣitā́ víṣṭhitānām /
prajā́patiḥ prathamajā́ ṛtásya //

2.8.1.5

sahásradhāmā juṣatām̐ havír naḥ /
sómāpūṣaṇā_ imáu deváu /
sómāpūṣaṇā rájaso vimā́nam /
saptácakram̐ rátham áviśvaminvam /
viṣūvṛ́taṃ mánasā yujyámānam /
táṃ jinvatho vṛṣaṇā páñcaraśmim /
divy ànyáḥ sádanaṃ cakrá uccā́ /
pṛthivyā́m anyó ádhy antárikṣe /
tā́v asmábhyaṃ puruvā́raṃ purukṣúm /
rāyás póṣaṃ víṣyatāṃ nā́bhim asmé //

2.8.1.6

dhíyaṃ pūṣā́ jinvatu viśvaminváḥ /
rayím̐ sómo rayipátir dadhātu /
ávatu devy áditir anarvā́ /
bṛhád vadema vidáthe suvī́rāḥ /
víśvāny anyó bhúvanā jajā́na /
víśvam anyó abhicákṣāṇa eti /
sómāpūṣaṇāv ávataṃ dhíyaṃ me /
yuvábhyāṃ víśvāḥ pṛ́tanā jayema /
úd uttamáṃ varuṇa_ ástabhnād dyā́m /
yát kíṃ ca_idáṃ kitavā́saḥ /
áva te héḍas tát tvā yāmi /
ādityā́nām ávasā ná dakṣiṇā́ /
dhāráyanta ādityā́sas tisró bhū́mīr dhārayan /
yajñó devā́nām̐ śúcir apáḥ //

2.8.2.1

té śukrā́saḥ śúcayo raśmivántaḥ /
sī́dann ādityā́ ádhi barhíṣi priyé /
kā́mena devā́ḥ saráthaṃ divó naḥ /
ā́yāntu yajñám úpa no juṣāṇā́ḥ /
té sūnávo áditeḥ pīvasā́m íṣam /
ghṛtáṃ pínvat prátiharyann ṛtejā́ḥ /
prá yajñíyā yájamānāya yemure /
ādityā́ḥ kā́maṃ pitumántam asme /
ā́ naḥ putrā́ aditer yāntu yajñám /
ādityā́saḥ pathíbhir devayā́naiḥ //

2.8.2.2

asmé kā́maṃ dāśúṣe sannámantaḥ /
puroḍā́śaṃ ghṛtávantaṃ juṣantām /
skabhāyáta nírṛtim̐ sédhata_ā́matim /
prá raśmíbhir yátamānā amṛdhrāḥ /
ā́dityāḥ kā́ma práyatāṃ váṣaṭkṛtim /
juṣádhvaṃ no havyádātiṃ yajatrāḥ /
ādityā́n kā́mam ávase huvema /
yé bhūtā́ni janáyanto vicikhyuḥ /
sī́dantu putrā́ áditer upástham /
stīrṇáṃ barhír havirádyāya devā́ḥ //

2.8.2.3

stīrṇáṃ barhíḥ sīdatā yajñé asmín /
dhrājā́ḥ sédhanto ámatiṃ durévām /
asmábhyaṃ putrā aditeḥ práyam̐sata /
ā́dityāḥ kā́ma havíṣo juṣāṇā́ḥ /
ágne náya supáthā rāyé asmā́n /
víśvāni deva vayúnāni vidvā́n /
yuyodhy àsmaj juhurāṇám énaḥ /
bhū́yiṣṭhāṃ te námauktiṃ vidhema /
prá vaḥ śukrā́ya bhānáve bharadhvam /
havyáṃ matíṃ ca_agnáye súpūtam //

2.8.2.4

yó dáivyāni mā́nuṣā janū́m̐ṣi /
antár víśvāni vidmánā jígāti /
ácchā gíro matáyo devayántīḥ /
agníṃ yanti dráviṇaṃ bhíkṣamāṇāḥ /
susaṃdṛ́śam̐ suprátīkam̐ sváñcam /
havyavā́ham aratíṃ mā́nuṣāṇām /
ágne tvám asmád yuyodhy ámīvāḥ /
ánagnitrā abhyàmanta kṛṣṭī́ḥ /
púnar asmábhyam̐ suvitā́ya deva /
kṣā́ṃ víśvebhir ajárebhir yajatra //

2.8.2.5

ágne tváṃ pā́rayā návyo asmā́n /
svastíbhir áti durgā́ṇi víśvā /
pū́ś ca pṛthvī́ bahulā́ na urvī́ /
bhávā tokā́ya tánayāya śáṃ yóḥ /
prá kāravo mananā́ vacyámānāḥ /
devadrī́cīṃ nayatha devayántaḥ /
dakṣiṇāvā́ḍ vājínī prā́cy eti /
havír bharanty agnáye ghṛtā́cī /
índraṃ náro, yujé rátham, /
jagṛbhṇā́ te dakṣiṇām indra hástam //

2.8.2.6

vasūyávo vasupate vásūnām /
vidmā́ hí tvā gópatim̐ śūra gónām /
asmábhyaṃ citráṃ vṛ́ṣaṇam̐ rayíṃ dāḥ /
táva_idáṃ víśvam abhítaḥ paśavyàm /
yát páśyasi cákṣasā sū́ryasya /
gávām asi gópatir éka indra /
bhakṣīmáhi te práyatasya vásvaḥ /
sám indra ṇo mánasā neṣi góbhiḥ /
sám̐ sūríbhir maghavant sám̐ svastyā́ /
sáṃ bráhmaṇā devákṛtaṃ yád ásti //

2.8.2.7

sáṃ devā́nām̐ sumatyā́ yajñíyānām /
ārāt_śátrum ápa bādhasva dūrám /
ugró yáḥ śambaḥ puruhūta téna /
asmé dhehi yávamad gómad indra /
kṛdhī́ dhíyaṃ jaritré vā́jaratnām /
ā́ vedhásam̐, sá hí śúciḥ, /
bṛ́haspátiḥ prathamáṃ jā́yamānaḥ /
mahó jyótiṣaḥ paramé vyòman /
saptā́syas tuvijātó ráveṇa /
ví saptáraśmir adhamat támām̐si //

2.8.2.8

bṛ́haspátiḥ sámajayad vásūni /
mahó vrajā́n gómato devá eṣáḥ /
apáḥ síṣāsant súvar ápratīttaḥ /
bṛ́haspátir hánty amítram arkáiḥ /
bṛ́haspate páry, evā́ pitré, /
ā́ no diváḥ, pā́vīravī, /
imā́ júhvānā, yás te stánaḥ, /
sárasvaty abhí no neṣi, /
iyám̐ śúṣmebhir bisakhā́ iva_arujat /
sā́nu girīṇā́ṃ taviṣébhir ūrmíbhiḥ /
pārāvadaghnī́m ávase suvṛktíbhiḥ /
sárasvatīm ā́vivāsema dhītíbhiḥ //

2.8.3.1

sómo dhenúm̐ sómo árvantam āśúm /
sómo vīráṃ karmaṇyàṃ dadātu /
sādanyàṃ vidathyàm̐ sabhéyam /
pituḥśrávaṇaṃ yó dádāśad asmai /
áṣāḍhaṃ yutsú, tvám̐ soma krátubhiḥ, /
yā́ te dhā́māni havíṣā yájanti, /
tvám imā́ óṣadhīḥ soma víśvāḥ /
tvám apó ajanayas tváṃ gā́ḥ /
tvámā́tatantha_urv àntárikṣam /
tváṃ jyótiṣā ví támo vavartha //

2.8.3.2

yā́ te dhā́māni diví yā́ pṛthivyā́m /
yā́ párvateṣv óṣadhīṣv apsú /
tébhir no víśvaiḥ sumánā áheḍan /
rā́jant soma práti havyā́ gṛbhāya /
víṣṇor nú kaṃ, tád asya priyám, /
prá tád víṇuḥ, /
paró mā́trayā tanúvā vṛdhāna /
ná te mahitvám ánvaśnuvanti /
ubhé te vidma rájasī pṛthivyā́ víṣṇo deva tvám /
paramásya vitse //

2.8.3.3

vícakrame, trír deváḥ, /
ā́ te mahó, yó jātá evá. /
abhí gotrā́ṇi. /
ā́bhiḥ spṛ́dho mithatī́r áriṣaṇyan /
amítrasya vyathayā manyúm indra ā́bhir víśvā abhiyújo víṣūcīḥ /
ā́ryāya víśo 'vatarīr dā́sīḥ /
ayám̐ śṛṇve ádha jáyann uta ghnán /
ayám utá prákṛṇute yudhā́ gā́ḥ /
yadā́ satyáṃ kṛṇuté manyúm índraḥ //

2.8.3.4

víśvaṃ dṛḍháṃ bhayata éjad asmāt /
ánu svadhā́m akṣarann ā́po asya /
ávardhata mádhya ā́ nāvyā̀nām /
sadhrīcī́nena mánasā tám indra ójiṣṭhena /
hánmanā_ahann abhí dyū́n /
marútvantaṃ vṛṣabháṃ vāvṛdhānám /
ákavāriṃ divyám̐ śāsám índram /
viśvāsā́ham áváse nū́tanāya /
ugrám̐ sahodā́m ihá tám̐ huvema /
jániṣṭhā ugráḥ sáhase turā́ya //

2.8.3.5

mandrá ójiṣṭho bahulā́bhimānaḥ /
ávardhann índraṃ marútaś cid átra /
mātā́ yád vīráṃ dadhánad dhániṣṭhā /
kvà syā vo marutaḥ svadhā́_āsīt /
yán mā́m ékam̐ samádhattā_ahihátye /
ahám̐ hy ùgrás taviṣás túviṣmān /
víśvasya śátror ánamaṃ vadhasnáiḥ /
vṛtrásya tvā śvasáthād ī́ṣamāṇāḥ /
víśve devā́ ajahur yé sákhāyaḥ /
marúdbhir indra sakhyáṃ te astu //

2.8.3.6

átha_imā́ víśvāḥ pṛ́tanā jayāsi /
vádhīṃ vṛtráṃ maruta indriyéṇa /
svéna bhā́mena taviṣó babhūvā́n /
ahám etā́ mánave viśváścandrāḥ /
sugā́ apáś cakara vájrabāhuḥ /
sá yó vṛ́ṣā vṛ́ṣṇiyebhiḥ sámokāḥ /
mahó diváḥ pṛthivyā́ś ca samrā́ṭ /
satīnásattvā hávyo bháreṣu /
marútvān no bhavatv índra ūtī́ /
índro vṛtrám atarad vṛtratū́rye //

2.8.3.7

anādhṛṣyó maghávā śū́ra índraḥ /
ánv enaṃ víśo amadanta pūrvíḥ /
ayám̐ rā́jā jágataś carṣaṇīnā́m /
sá evá vīráḥ sá u vīryā̀vān /
sá ekarājó jágataḥ paraspā́ḥ /
yadā́ vṛtrám átarat_śū́ra índraḥ /
átha_abhavad damitā́_abhíkratūnām /
índro yajñáṃ vardháyan viśvávedāḥ /
puroḍā́śasya juṣatām̐ havír naḥ /
vṛtráṃ tīrtvā́ dānaváṃ vájrabāhuḥ //

2.8.3.8

díśo 'dṛm̐had dṛm̐hitā́ dṛ́m̐haṇena /
imáṃ yajñáṃ vardháyan viśvávedāḥ /
puroḍā́śaṃ prátigṛbhṇātv índraḥ /
yadā́ vṛtrám átart_śū́ra índraḥ /
átha_ekarājó abhavaj jánānām /
índro devā́n_śambarahátya āvat /
índro devā́nām abhavat purogā́ḥ /
índro yajñé havíṣā vāvṛdhānáḥ /
vṛtratū́r ṇo ábhayam̐ śárma yam̐sat /
yáḥ saptá síndhūm̐r ádadhāt pṛthivyā́m /
yáḥ saptá lokā́n ákṛṇod díśaś ca /
índro havíṣmānt ságaṇo marúdbhiḥ /
vṛtratū́r ṇo yajñám ihá_upayāsat //

2.8.4.1

índras tárasvān abhimātihā́_ugráḥ /
híraṇyavāśīr iṣiráḥ suvarṣā́ḥ /tásya vayám̐ sumatáu yajñíyasya /
ápi bhadré saumanasé syāma /
híraṇyavarṇo ábhayaṃ kṛṇotu /
abhimātihā́_índraḥ pṛ́tanāsu jiṣṇúḥ /
sá naḥ śárma trivárūthaṃ víyam̐sat /
yūyáṃ pāta svastíbhiḥ sádā naḥ /
índram̐ stuhi vajríṇam̐ stómapṛṣṭham sómapṛṣṭham /
puroḍā́śasya juṣatām̐ havír naḥ //

2.8.4.2

hatvā́_abhímātīḥ pṛ́tanāḥ sáhasvān /
átha_ábhayaṃ kṛṇuhi viśváto naḥ /
stuhí śū́raṃ vajríṇam ápratītam /
abhimātihánaṃ puruhūtam índram /
yá éka ít_śatápatir jáneṣu /
tásmā índrāya havír ā́juhota /
índro devā́nām adhipā́ḥ puróhitaḥ /
diśā́ṃ pátir abhavad vājínīvān /
abhimātihā́ taviṣás túviṣmān /
asmábhyaṃ citráṃ vṛ́ṣaṇam̐ rayíṃ dāt //

2.8.4.3

yá imé dyā́vāpṛthivī́ mahitvā́ /
bálena_ádṛm̐had abhimātihā́_índraḥ /
sá no havíḥ prátigṛbhṇātu rātáye /
devā́nāṃ devó nidhipā́ no avyāt /
ánavas te ráthaṃ, vṛṣṇe yát te. /
índrasya nú vīryā̀ṇy, ahann áhim, /
índro yātó 'vasitasya rā́jā /
śámasya ca śṛṅgíṇo vájrabāhuḥ /
sa_íd u rā́jā kṣeti carṣaṇīnā́m /
arā́n ná nemíḥ pári tā́ babhūva //

2.8.4.4

abhí sidhmó ajigād asya śátrūn /
ví tigména vṛṣabhéṇā púro 'bhet /
sáṃ vájreṇa_asṛjad vṛtrám índraḥ /
prá svā́ṃ matím atirat_śā́śadānaḥ /
víṣṇuṃ deváṃ váruṇam ūtáye bhágam /
médasā devā́ vapáyā yajadhvam /
tā́ no yajñám ā́gataṃ viśvádhenā /
prajā́vad asmé dráviṇā_ihá dhattam /
médasā devā́ vapáyā yajadhvam /
víṣṇuṃ ca deváṃ váruṇaṃ ca rātím //

2.8.4.5

tā́ no ámīvā apabā́dhamānau /
imáṃ yajñáṃ juṣámāṇāv úpétam /
víṣṇūvaruṇā yuvám adhvarā́ya naḥ /
viśé jánāya máhi śárma yacchatam /
dīrgháprayajyū havíṣā vṛdhānā́ /
jyotiṣā́_árātīr dahataṃ támām̐si /
yáyor ójasā skabhitā́ rájām̐si /
vīryèbhir vīrátamā śáviṣṭhā /
yā́ pátyete ápratītā śahobhiḥ /
víṣṇū agán váruṇā pūrváhūtau //

2.8.4.6

víṣṇūvaruṇāv abhiśastipā́ vām /
devā́ yajanta havíṣā ghṛténa /
ápa_ámīvām̐ sedhatam̐ rakṣásaś ca /
áthā dhattaṃ yájamānāya śáṃ yóḥ /
am̐homúcā vṛṣabhā́ suprátūrtī /
devā́nāṃ devátamā śáviṣṭhā /
víṣṇūvaruṇā prátiharyataṃ naḥ /
idáṃ nárā práyatam ūtáye havíḥ /
mahī́ nú dyā́vāpṛthivī́ ihá jyéṣṭhe /
rucā́ bhavatām̐ śucáyadbhir arkáiḥ //

2.8.4.7

yát sīṃ váriṣṭhe bṛhatī́ viminván /
nṛvádbhyó 'kṣā́ paprathānébhir évaiḥ /
prá pūrvajé pitárā návyasībhiḥ /
gīrbhíḥ kṛṇudhvam̐ sádane ṛtásya /
ā́ no dyāvāpṛthivī dáivyena /
jánena yātaṃ máhi vāṃ várūtham /
sá ít svápā bhúvaneṣv āsa /
yá imé dyā́vāpṛthivī́ jajā́na /
urvī́ gabhīré rájasī suméke /
avam̐śé dhī́raḥ śácyā sámairat //

2.8.4.8

bhū́riṃ dvé ácarantī cárantam /
padvántaṃ gárbham apádī dadhāte /
nítyaṃ ná sūnúṃ pitrór upásthe /
táṃ pipṛtam̐ rodasī satyavā́cam /
idáṃ dyāvāpṛthivī satyám astu /
pítar mā́tar yád ihá_upabruvé vām /
bhūtáṃ devā́nām avamé ávobhiḥ /
vídyā́ma_iṣáṃ vṛjánaṃ jīrádānum /
urvī́ pṛthvī́ bahulé dūré_ante /
úpabruve námasā yajñé asmín /
dádhāte yé subháge suprátūrtī /
dyā́vā rákṣataṃ pṛthivī́ no ábhvāt /
yā́ jātā́ óṣadhayó, 'ti víśvāḥ pariṣṭhā́ḥ, /
yā́ óṣadhayaḥ sómarājñīr, aśvāvatī́m̐ somavatī́m, /
óṣadhīr íti mātaro, 'nyā́ vo anyā́m avatu, //

2.8.5.1

śúciṃ nú stómam̐, śnáthad vṛtrám, /
ubhā́ vām indrāgnī, prá carṣaṇíbhyaḥ, /
ā́ vṛtrahaṇā, gīrbhír vípraḥ, /
bráhmaṇaspate tvám asyá yantā́ /
sūktásya bodhi tánayaṃ ca jinva /
víśvaṃ tád bhadráṃ yád avánti devā́ḥ /
bṛhád vadema vidáthe suvī́rāḥ /
sá īm̐ satyébhiḥ sákhibhiḥ śucádbhiḥ /
gódhāyasaṃ ví dhanasáir atardat /
bráhmaṇaspátir vṛ́ṣabhir varā́haiḥ //

2.8.5.2

gharmásvedobhir dráviṇaṃ vyā̀naṭ /
bráhmaṇaspáter abhavad yathāvaśám /
satyó manyúr máhi kármā kariṣyatáḥ /
yó gā́ udā́jat sá divé ví ca_abhajat /
mahí_iva rītíḥ śávasā sarat pṛ́thak /
índhāno agníṃ vanavad vanuṣyatáḥ /
kṛtábrahmā śūśuvad rātáhavya ít /
jāténa jātám áti sṛ́t prásṛm̐sate áti sá prásarsṛte, /
yáṃ_yaṃ yújaṃ kṛṇuté bráhmaṇaspátiḥ /
bráhmaṇaspate suyámasya viśváhā //

2.8.5.3

rāyáḥ syāma rathyò vívasvataḥ /
vīréṣu vīrā́m̐ úpapṛṅgdhi nas tvám /
yád ī́śāno bráhmaṇā véṣi me hávam /
sá íj jánena sá viśā́ sá jánmanā /
sá putráir vā́jaṃ bharate dhánā nṛ́bhiḥ /
devā́nāṃ yáḥ pitáram āvívāsati /
śraddhā́manā havíṣā bráhmaṇaspátim /
yás te pūṣan nā́vo antáḥ, /
śukráṃ te anyát, pūṣā́_imā́ ā́śāḥ, /
prápathe pathā́m ajaniṣṭa pūṣā́ //

2.8.5.4

prápathe diváḥ prápathe pṛthivyā́ḥ /
ubhé abhí priyátame sadhásthe /
ā́ ca párā ca carati prajānán /
pūṣā́ subándhur divá ā́ pṛthivyā́ḥ /
iḍas pátir maghávā dasmávarcāḥ /
táṃ devā́so ádaduḥ sūryā́yai /
kā́mena kṛtáṃ tavásam̐ sváñcam /
ajā́śvaḥ paśupā́ vā́javastyaḥ /
dhiyaṃjinvó víśve bhúvane árpitaḥ /
áṣṭrāṃ pūṣā́ śithirā́m udvárīvṛjat //

2.8.5.5

saṃcákṣāṇo bhúvanā devá īyate /
śúcī vo havyā́ marutaḥ śúcīnām /
śúcim̐ hinomy adhvarám̐ śúcibhyaḥ /
ṛténa satyám ṛ́tasā́pa āyan /
śúcijanmānaḥ śúcayaḥ pāvakā́ḥ /
prá citrám arkáṃ gṛṇate turā́ya /
mā́rutāya svátavase bharadhvam /
yé sáhām̐si sáhasā sáhante /
réjate agne pṛthivī́ makhébhyaḥ /
ám̐seṣv ā́ marutaḥ khādáyo vaḥ //

2.8.5.6

vákṣaḥsu rukmā́ úpaśiśriyāṇā́ḥ /
ví vidyúto ná vyṛṣṭíbhī rucānā́ḥ /
ánu svadhā́m ā́yudhair yát_śamānāḥ /
yā́ vaḥ śárma śaśamānā́ya sánti /
tridhā́tūni dāśúṣe yacchata_ádhi /
asmábhyaṃ tā́ni maruto víyanta /
rayíṃ no dhatta vṛṣaṇaḥ suvī́ram /
imé turáṃ marúto rāmayanti /
imé saháḥ sáhasa ā́namanti /
imé śám̐saṃ vanuṣyató nípānti //

2.8.5.7

gurú dvéṣo áraruṣe dadhanti /
arā́ iva_íd ácaramā áha_iva /
prá prajāyante ákavā máhobhiḥ /
pṛ́śneḥ putrā́ upamā́so rábhiṣṭhāḥ /
sváyā matyā́ marútaḥ sáṃmimikṣuḥ /
ánu te dāyi mahá indriyā́ya /
satrā́ te víśvam ánu vṛtrahátye /
ánu kṣattrám ánu sáho yajatra /
índra devébhir ánu te nṛṣáhye /
yá índra śúṣmo maghavan te ásti //

2.8.5.8

śíkṣā sákhibhyaḥ puruhūta nṛ́bhyaḥ /
tvám̐ hí dṛḍhā́ maghavan vícetāḥ /
ápāvṛdhi párivṛtiṃ ná rā́dhaḥ /
índro rā́jā jágataś carṣaṇīnā́m /
ádhi kṣámi víṣurūpaṃ yád ásti /
táto dadātu dāśúṣe vásūni /
códad rā́dha úpastutaś cid arvā́k /
tám u ṣṭuhi yó abhíbhūtyojāḥ /
vanvánn ávātaḥ puruhūtá índraḥ /
áṣāḍham ugrám̐ sáhamānam ābhíḥ //
gīrbhír vardha vṛṣabháṃ carṣaṇīnā́m /
sthūrásya rāyó bṛható yá ī́śe /
tám u ṣṭavāma vidátheṣv índram /
yó vāyúnā jáyati gómatīṣu /
prá dhṛṣṇuyā́ nayati vásyo áccha /
ā́ te śúṣmo vṛṣabhá étu paścā́t /
ā́_uttarā́d adharā́g ā́ purástāt /
ā́ viśváto abhí sámetv arvā́ṅ /
índra dyumnám̐ súvarvad dhehy asmé //

2.8.6.1

ā́ devó yātu savitā́ surátnaḥ /
antarikṣaprā́ váhamāno áśvaiḥ /
háste dádhāno náryā purū́ṇi /
niveśáyan ca prasuván ca bhū́ma /
abhī́vṛtaṃ kṛ́śanair viśvárūpam /
híraṇyaśamyaṃ yajató bṛhántam /
ā́sthād rátham̐ savitā́ citrábhānuḥ /
kṛṣṇā́ rájām̐si táviṣīṃ dádhānaḥ /
sá ghā no deváḥ savitā́ savā́ya /
ā́sāviṣad vásupatir vásūni //

2.8.6.2

viśráyamāṇo ámatim urūcī́m /
martabhójanam ádha rāsate na naḥ /
ví jánān_śyāvā́ḥ śitipā́do akhyan /
rátham̐ híraṇyapraugaṃ váhantaḥ /
śáśvad díśaḥ savitúr dáivyasya /
upásthe víśvā bhúvanāni tasthuḥ /
ví suparṇó antárikṣāṇy akhyat /
gabhīrávepā ásuraḥ sunītháḥ /
kva_ìdānīm̐ sū́ryaḥ káś ciketa /
katamā́ṃ dyā́m̐ raśmír asya_ā́tatāna //

2.8.6.3

bhágaṃ dhíyaṃ vājáyantaḥ púrandhim /
nárāśám̐so gnā́spátir no avyāt /
ā́ 'yé vāmásya saṃgathé rayīṇā́m /
priyā́ devásya savitúḥ syāma /
ā́ no víśve áskrā gamantu devā́ḥ /
mitró aryamā́ váruṇaḥ sajóṣāḥ /
bhúvan yáthā no víśve vṛdhā́saḥ /
kárant suṣáhā vithuráṃ ná śávaḥ /
śáṃ no devā́ viśvádevā bhavantu /
śám̐ sárasvatī sahá dhībhír astu //

2.8.6.4

śám abhiṣācaḥ śám u rātiṣā́caḥ /
śáṃ no divyā́ḥ pā́rthivāḥ śáṃ no ápyāḥ /
yé savitúḥ satyásavasya víśve /
mitrásya vraté váruṇasya devā́ḥ /
té sáubhagaṃ vīrávad gómad ápnaḥ /
dádhātana dráviṇaṃ citrám asmé /
ágne yāhí dūtyàṃ vā́riṣeṇyaḥ /
devā́m̐ ácchā brahmakṛ́tā gaṇéna /
sárasvatīṃ marúto aśvínā_apáḥ /
yakṣi devā́n ratnadhéyāya víśvān //

2.8.6.5

dyáuḥ pitaḥ pṛ́thivi mā́tar ádhruka /
ágne bhrātarvasavo mṛḍátā naḥ /
víśva ādityā ādite sajóṣāḥ /
asmábhyam̐ śárma bahuláṃ víyanta /
víśve devāḥ śṛṇuta_ímám̐ hávaṃ me /
yé antárikṣe yá úpa dyávi ṣṭhá /
yé agnijihvā́ utá vā yájatrāḥ /
āsádya_asmín barhíṣi mādayadhvam /
ā́ vāṃ mitrāvaruṇā havyájuṣṭim /
námasā devāváv avasā vavṛtyām //

2.8.6.6

asmā́kaṃ bráhma pṛ́tanāsu sahyā asmā́kam /
vṛṣṭír divyā́ supārā́ /
yuváṃ vástrāṇi pīvasā́ vasāthe /
yuvór ácchidrā mántavo ha sárgāḥ /
ávātiratam ánṛtāni víśvā /
ṛténa mitrāvaruṇā sacethe /
tát sú vāṃ mitrāvaruṇā mahitvám /
īrmā́ tasthúṣīr áhabhir duduhre /
víśvāḥ pinvatha svásarasya dhénāḥ ánu vām ékaḥ pavír ā́vavarti //

2.8.6.7

yád bám̐hiṣṭhaṃ ná_ativíde sudānū /
ácchidram̐ śárma bhúvanasya gopā /
táto no mitrāvaruṇāv avīṣṭam /
síṣāsanto jīgivā́m̐saḥ syāma /
ā́ no mitrāvaruṇā havyádātim /
ghṛtáir gávyūtim ukṣatam íḍābhiḥ /
práti vām átra váram ā́ jánāya /
pṛṇītám udgó divyásyaṃ cā́roḥ /
prá bāhávā sisṛtaṃ jīváse naḥ /
ā́ no gávyūtim ukṣataṃ ghṛténa //

2.8.6.8

ā́ no jáne śravayataṃ yuvānā /
śrutáṃ me mitrāvaruṇā háva_imā́ /
imā́ rudrā́ya sthirádhanvane gíraḥ /
kṣipréṣave devā́ya svadhā́mne /
áṣāḍhāya sáhamānāya mīḍhúṣe /
tigmā́yudhāya bharatā śṛṇótana /
tvā́ dattebhī rudra śáṃtamebhiḥ /
śatám̐ hímā aśīya bheṣajébhiḥ /
vy àsmád dvéṣo vitaráṃ vy ám̐haḥ /
vy ámīvām̐ś cātayasvā víṣūcīḥ //

2.8.6.9

árhan bibharṣi, mā́ nás toké, /
ā́ te pitar marutām̐ sumnám etu /
mā́ naḥ sū́ryasya saṃdṛ́śo yuyothāḥ /
abhí no vīró árvati kṣameta /
prájāyemahi rudra prajā́bhiḥ /
evā́ babhro vṛṣabha cekitāna /
yáthā deva ná hṛṇīṣé ná hám̐si /
hāvanaśrū́r no rudra_ihá bodhi /
bṛhád vadema vidáthe suvī́rāḥ /
pári ṇo rudrásya hetíḥ, stuhí śrutám, /
mī́ḍhuṣṭama_, árhan bibharṣi, /
tvám agne rudrá, ā́ vo rā́jānam, //

2.8.7.1

sū́ryo devī́m uṣásam̐ rócamānā máryaḥ /
ná yóṣām abhyèti paścā́t /
yátrā náro devayánto yugā́ni /
vitanváte práti bhadrā́ya bhadrám /
bhadrā́ áśvā harítaḥ sū́ryasya /
citrā́ édagvā anumā́dyāsaḥ /
namasyánto divá ā́ pṛṣṭhám asthuḥ /
pári dyā́vāpṛthivī́ yanti sadyáḥ /
tát sū́ryasya devatváṃ tán mahitvám /
madhyā́ kártor vítatam̐ sáṃjabhāra //

2.8.7.2

yadā́_id áyukta harítaḥ sadhásthāt /
ā́d rā́trī vā́sas tanute simásmai /
tán mitrásya váruṇasya_abhicákṣe /
sū́ryo rūpáṃ kṛṇute dyór upásthe /
anantám anyád drúśad asya pā́jaḥ /
kṛṣṇám anyád dharítaḥ sáṃbharanti /
adyā́ devā úditā sū́ryasya /
nír ám̐hasaḥ pipṛtā́n níravadyā́t /
tán no mitró váruṇo māmahantām /
áditiḥ síndhuḥ pṛthivī́ utá dyáuḥ //

2.8.7.3

divó rukmá urucákṣā údeti /
dūré_arthas taráṇir bhrā́jamānaḥ /
nūnáṃ jánāḥ sū́ryeṇa prásūtāḥ /
ā́yánn árthāni kṛṇávann ápām̐si /
śáṃ no bhava cákṣasā śáṃ no áhnā /
śáṃ bhānúnā śám̐ himā́ śáṃ ghṛṇéna /
yáthā śám asmái śám ásad duroṇé /
tát sūrya dráviṇaṃ dhehí citrám /
citráṃ devā́nām údagād ánīkam /
cákṣur mitrásya váruṇasya_agnéḥ //

2.8.7.4

ā́prā dyā́vāpṛthivī́ antárikṣam /
sū́rya ātmā́ jágatas tasthúṣaś ca /
tváṣṭā dádhat, tán nas turī́pam, /
tváṣṭā vīráṃ, piśáṅgarūpaḥ, /
dáśa_imáṃ tváṣṭur janayanta gárbham /
átandrāso yuvatáyo bíbhartram /
tigmā́nīkam̐ sváyaśasaṃ jáneṣu /
virócamānaṃ pári ṣīṃ nayanti /
ā́víṣṭyo vardhate cā́rur āsu /
jihmā́nām ūrdhváḥ sváyaśā upásthe //

2.8.7.5

ubhé tváṣṭur bibhyatur jā́yamānāt /
pratī́cī sim̐háṃ prátijoṣayete /
mitró jánān, prá sá mitra, /
ayáṃ mitró namasyàḥ suśévaḥ /
rā́jā sukṣatró ajaniṣṭa vedhā́ḥ /
tásya vayám̐ sumatáu yajñíyasya ápi bhadré saumanasé syāma /
anamīvā́saṃ íḍayā mádantaḥ /
mitájmavo várimann ā́ pṛthivyā́ḥ /
ādityásya vratám upakṣyántaḥ //

2.8.7.6

vayáṃ mitrásya sumatáu syāma /
mitráṃ ná ī́m̐ śímyā góṣu gavyávat /
svādhíyo vidáthe apsv ájījanan /
árejayatām̐ ródasī pā́jasā girā́ /
práti priyáṃ yajatáṃ janúṣām ávaḥ /
mahā́m̐ ādityó námasā_upasádyah /
yātayájjano gṛṇaté suśévaḥ /
tásmā etát pányatamāya júṣṭam /
agnáu mitrā́ya havír ā́juhota /
ā́ vām̐ rátho ródasī badbadhānáḥ //

2.8.7.7

hiraṇyáyo vṛ́ṣabhir yātv áśvaiḥ /
ghṛtávartaniḥ pavíbhī rucānáḥ /
iṣā́ṃ voḍhā́ nṛpátir vājínīvān /
sá paprathānó abhí páñca bhū́ma /
trivandhuró mánasā_ā́yātu yuktáḥ /
víśo yéna gácchatho devayántīḥ /
kútrācid yā́mam aśvinā dádhānā /
sváśvā yaśásā_ā́yātam arvā́k /
dásrā nidhíṃ mádhumantaṃ pibāthaḥ /
ví vām̐ rátho vadhvā̀ yā́damānaḥ //

2.8.7.8

ántān divó bādhate vartaníbhyām /
yuvóḥ śríyaṃ pári yóṣā vṛṇīta /
sū́ro duhitā́ páritakmiyāyām /
yád devayántam ávathaḥ śácībhiḥ /
páríghram̐sá vāṃ mánā vāṃ váyo gām /
yó ha syá vām̐ rathirā vásta usrā́ḥ /
rátho yujānáḥ pariyā́ti vartíḥ /
téna naḥ śáṃ yór uṣáso vyùṣṭau /
ny àśvínā vahataṃ yajñé asmín /
yuváṃ bhujyúm ávaviddham̐ samudré //

2.8.7.9

údūhathur árṇasó ásridhānaiḥ /
patatríbhir aśramáir avyathíbhiḥ /
dam̐sánābhir aśvinā pāráyantām /
ágnīṣomā yó adyá vām /
idáṃ vácaḥ saparyáti /
tásmai dhattam̐ suvī́ryam /
gávāṃ póṣam̐ sváśviyaṃ /
yó agnī́ṣómā havíṣā saparyā́t /
devadrī́cā mánasā yó ghṛténa /
tásya vratám̐ rakṣataṃ pātám ám̐hasaḥ //

2.8.7.10

viśé jánāya mahi śárma yacchatam /
ágnīṣomā yá ā́hutim /
yó vāṃ dā́śād dhavíṣkṛtim /
sá prajáyā suvī́ryam /
víśvam ā́yur vyàśnavat /
ágnīṣomā céti tád vīryàṃ vām /
yád ámuṣṇītam avasáṃ paṇíṃ góḥ /
ávātirataṃ práthayasya śéṣaḥ ávindataṃ jyótir ékaṃ bahúbhyaḥ /
ágnīṣomāv imám̐ sú mé, 'gnīṣomā havíṣaḥ prásthitasya, //

2.8.8.1

ahám asmi prathamajā́ ṛtásya /
pū́rvaṃ devébhyo amṛ́tasya nā́bhiḥ /
yó mā dádāti sá íd evá mā́_āvāḥ /
ahám ánnam ánnam adántam admi /
pū́rvam agnér ápi dahaty ánnam /
yattáu ha_āsāte ahamuttaréṣu /
vyā́ttam asya paśávaḥ sujámbham /
páśyanti dhī́rāḥ prácaranti pā́kāḥ /
jáhāmy anyáṃ ná jahāmy anyám /
ahám ánnaṃ váśam ít_carāmi //

2.8.8.2

samānám árthaṃ páryemi bhuñját /
kó mā́m ánnaṃ manuṣyò dayeta /
párāke ánnaṃ níhitaṃ loká etát /
víśvair deváiḥ pitṛ́bhir guptám ánnam /
yád adyáte lupyáte yát paropyáte /
śatatamī́ sā́ tanū́r me babhūva /
mahā́ntau carū́ sakṛddugdhéna paprau /
dívaṃ ca pṛ́śni pṛthivī́ṃ ca sākám /
tát saṃpíbanto ná minanti vedhásaḥ /
ná_etád bhū́yo bhávati nó kánīyaḥ //

2.8.8.3

ánnaṃ prāṇám ánnam apānám āhuḥ /
ánnaṃ mṛtyúṃ tám u jīvā́tum āhuḥ /
ánnaṃ brahmā́ṇo jarásaṃ vadanti /
ánnam āhuḥ prajánanaṃ prajā́nām /
mógham ánnaṃ vindate ápracetāḥ /
satyáṃ bravīmi vadhá ít sá tásya /
ná_aryamáṇaṃ púṣyati nó sákhāyam /
kévalāgho bhavati kevalādī́ /
aháṃ megháḥ stanáyan várṣann asmi /
mā́m adanty ahám admy anyā́n //

2.8.8.4

áham̐ sád amṛ́to bhavāmi /
mád ādityā́ ádhi sárve tapanti /
devī́ṃ vā́cam ajanayanta, yád vā́g vádanti, /
anantā́m ántād ádhi nírmitāṃ mahī́m /
yásyāṃ devā́ adadhur bhójanāni /
ékākṣarāṃ dvipádām̐ ṣáṭpadāṃ ca /
vā́caṃ devā́ úpajīvanti víśve /
vā́caṃ devā́ úpajīvanti víśve /
vā́caṃ gandharvā́ḥ paśávo manuṣyā̀ḥ /
vācí_ímā́ víśvā bhúvanāny árpitā //

2.8.8.5

sā́ no hávaṃ juṣatām índrapatnī /
vā́g akṣáraṃ prathamajā́ ṛtásya /
védānāṃ mātā́_amṛ́tasya nā́bhiḥ /
sā́ no juṣāṇó 'payajñám ā́gāt /
ávantī devī́ suhávā me astu /
yā́m ṛ́ṣayo mantrakṛ́to manīṣíṇaḥ /
anváicchan devā́s tápasā śrámeṇa /
tā́ṃ devī́ṃ vā́cam̐ havíṣā yajāmahe /
sā́ no dadhātu sukṛtásya loké /
catvā́ri vā́k párimitā padā́ni //

2.8.8.6

tā́ni vidur brāhmaṇā́ yé manīṣíṇaḥ /
gúhā trī́ṇi níhitā ná_iṅgayanti /
turī́yaṃ vācó manuṣyā̀ vadanti /
śraddháyā_agníḥ sámidhyate /
śraddháyā vindate havíḥ /
śraddhā́ṃ bhágasya mūrdháni /
vácasā_ā́vedayāmasi /
priyám̐ śraddhe dádataḥ /
priyám̐ śraddhe dídāsataḥ /
priyáṃ bhojéṣu yájvasu //

2.8.8.7

idáṃ ma uditáṃ kṛdhi /
yáthā devā́ ásureṣu /
śraddhā́m ugréṣu cakriré /
eváṃ bhojéṣu yájvasu /
asmā́kam uditáṃ kṛdhi /
śraddhā́ṃ devā yájamānāḥ /
vāyúgopā úpāsate /
śraddhā́m̐ hṛdayyàyā_ā́kūtyā /
śraddháyā hūyate havíḥ /
śraddhā́ṃ prātár havāmahe //

2.8.8.8

śraddhā́ṃ madhyáṃdinaṃ pári /
śraddhā́m̐ sū́ryasya nimrúci /
śráddhe śráddhāpaya_ihá mā /
śraddhā́ devā́n ádhivaste /
śraddhā́ víśvam idáṃ jágat /
śraddhā́ṃ kā́masya mātáram /
havíṣā vardhayāmasi /
bráhma jajñānáṃ prathamáṃ purástāt /
ví sīmatáḥ surúco vená āvaḥ /
sá budhníyā upamā́ asya viṣṭhā́ḥ //

2.8.8.9

satáś ca yónim ásataś ca vívaḥ /
pitā́ virā́jām ṛṣabhó rayīṇā́m /
antárikṣaṃ viśvárūpa ā́viveśa /
tám arkáir abhyàrcanti vahsám /
bráhma sántaṃ bráhmaṇā vardháyantaḥ /
bráhma devā́n ajanayat /
bráhma víśvam idáṃ jágat /
bráhmaṇaḥ kṣatráṃ nírmitam /
bráhma brāhmaṇá ātmánā /
antár asminn imé lokā́ḥ //

2.8.8.10

antár víśvam idáṃ jágat /
bráhma_evá bhūtā́nāṃ jyéṣṭham /
téna kò 'rhati spárdhitum /
bráhman devā́s tráyastrim̐śat /
bráhmann indraprajāpatī́ /
bráhman ha víśvā bhūtā́ni /
nāví_iva_antáḥ samā́hitā /
cátasra ā́śāḥ prácarantv agnáyaḥ /
imáṃ no yajñáṃ nayatu prajānán /
ghṛtáṃ pínvann ajáráṃ suvī́ram //

2.8.8.11

bráhma samíd bhávaty ā́hutīnām /
ā́ gā́vo agmann utá bhadrám akran /
sī́dantu goṣṭhé raṇáyantv asmé /
prajā́vatīḥ pururū́pā ihá syuḥ /
índrāya pūrvī́r uṣáso dúhānāḥ /
índro yájvane pṛṇaté ca śikṣati /
úpa_íd dadāti ná sváṃ muṣāyati /
bhū́yo_bhūyo rayím íd asya vardháyan /
ábhinne khillé nídadhāti devayúm /
ná tā́ naśanti, ná tā́ árvā, //

2.8.8.12

gā́vo bhágo gā́va índro me acchāt , /
gā́vaḥ sómasya prathamásya bhakṣáḥ /
imā́ yā́ gā́vaḥ sá janāsa índraḥ /
icchā́mi_íd dhṛdā́ mánasā cid índram /
yūyáṃ gāvo medayathā kṛśáṃ cit /
aślīláṃ cit kṛṇuthā suprátīkam /
bhadráṃ gṛháṃ kṛṇutha bhadravācaḥ /
bṛhád vo váya ucyate sabhā́su /
prajā́vatīḥ sūyávasam̐ riśántīḥ /
śuddhā́ apá suprapāṇé píbantīḥ /
mā́ vaḥ stená īśata mā́_agháśam̐saḥ /
pári vo hetī́ rudrásya vṛñjyāt /
úpa_idám úpapárcanam /
āsú góṣu_úpapṛcyatām /
úpa_ ṛṣabhásya rétasi /
úpa_indra táva vīryé //

2.8.9.1

tā́ sūryācandramásā viśvabhṛ́ttamā mahát /
téjo vásumad rājato diví /
sā́mātmānā carataḥ sāmacāríṇā /
yáyor vratáṃ ná mamé jā́tu deváyoḥ /
ubhā́v antau páriyāta ármyā /
divó ná raśmī́m̐s tanutó vy arṇavé /
ubhā́ bhuvantī́ bhúvanā kavíkratū /
sū́ryā ná candrā́ carato hatā́matī /
pátī dyumád viśvavídā ubhā́ diváḥ /
sū́ryā ubhā́ candrámasā vicakṣaṇā́ //

2.8.9.2

viśvávārā virivo_bhā́ váreṇyā /
tā́ no 'vataṃ matimántā máhivratā /
viśvaváparī pratáraṇā tarantā́ /
suvarvídā dṛśáye bhū́riraśmī /
sū́ryā hí candrā́ vásu tveṣá darśatā /
manasvínā_ubhā́_anucarató nu sáṃ dívam /
asyá śrávo nadyàḥ saptá bibhrati /
dyā́vākṣā́mā pṛthivī́ darśatáṃ vápuḥ /
asmé sūryācandramásā_abhicákṣe /
śraddhé kám indra carato vicarturám //

2.8.9.3

pūrvāparáṃ carato māyáyā_etáu /
śíśū krī́ḍantau páriyāto adhvarám /
víśvāny anyó bhúvanā_abhicáṣṭe /
ṛtū́n anyó vidádhaj jāyate púnaḥ /
híraṇyavarṇāḥ śúcayaḥ pāvakā́, yā́sām̐ rā́jā, /
yā́sāṃ devā́ḥ, śivéna mā cákṣuṣā paśyata, /
ā́po bhadrā́, ā́d ít paśyāmi, /
ná_asad āsīn nó sád āsīt tadā́nīm /
ná_āsīd rájo nó vyòma_aparó yát /
kím ā́varīvaḥ kúha kásya śárman //

2.8.9.4

ámbhaḥ kím āsīd gáhanaṃ gabhīrám /
ná mṛtyúr amṛ́taṃ tárhi ná
here rā́triyā áhna āsīt praketáḥ /
ā́nīd avātám̐ svadháyā tád ékam /
tásmād dha_anyáṃ ná paráḥ kíṃ cana_ā́sa /
táma āsīt támasā gūḍhám ágre praketám /
salilám̐ sárvam ā idám /
tucchénābhv ápihitaṃ yád ā́sīt /
támasas tán mahinā́_ajāyata_ékam /
kā́mas tád ágre sám avartata_ádhi //

2.8.9.5

mánaso rétaḥ prathamáṃ yád ā́sīt /
sató bándhum ásati níravindan /
hṛdí pratī́ṣyā kaváyo manīṣā́ /
tiraścī́no vítato raśmír eṣām /
adháḥ svid āsī3d upári svid āsī3t /
retodhā́ āsan mahimā́na āsan /
svadhā́ avástāt práyatiḥ parástāt /
kó addhā́ veda ká ihá právocat /
kúta ā́jātā kúta iyáṃ vísṛṣṭiḥ /
arvā́g devā́ asyá visárjanāya //

2.8.9.6

áthā kó veda yáta ābabhū́va /
iyáṃ vísṛṣṭir yáta ābabhū́va /
yádi vā dadhé yádi vā ná /
yó asyā́_adhyakṣaḥ paramé vyòman /
só aṅgá véda yádi vā ná véda /
kím̐ svid vánaṃ ká u sá vṛkṣá āsīt /
yáto dyā́vāpṛthivī́ niṣṭatakṣúḥ /
mánīṣiṇo mánasā pṛccháta_íd u tát /
yád adhyátiṣṭhad bhúvanāni dhāráyan /
bráhma vánaṃ bráhma sá vṛkṣá āsīt //

2.8.9.7

yáto dyā́vāpṛthivī́ niṣṭatakṣúḥ /
mánīṣiṇo mánasā víbravīmi vaḥ /
bráhmā_adhyátiṣṭhad bhúvanāni dhāráyan /
prātár agníṃ prātár índram̐ havāmahe /
prātár mitrā́váruṇā prātár aśvínā /
prātár bhágaṃ pūṣáṇaṃ bráhmaṇaspátim /
prātáḥ sómam utá rudrám̐ huvema /
prātár jítaṃ bhágam ugrám̐ huvema /
vayáṃ putrám áditer yó vidhartā́ /
ādhráś cid yáṃ mányamānas turáś cit //

2.8.9.8

rā́jā cid yáṃ bhágaṃ bhakṣi_íty ā́ha /
bhága práṇetar bhága sátyarādhaḥ /
bhága_imā́ṃ dhíyam údava dádan naḥ /
bhága prá ṇo janaya góbhir áśvaiḥ /
bhága prá nṛ́bhir nṛvántaḥ syāma /
utá_idā́nīṃ bhágavantaḥ syāma /
utá prápitvá utá mádhye áhnām /
uta_úditā maghavant sū́ryasya /
vayáṃ devā́nām̐ sumatáu syāma /
bhága evá bhágavām̐ astu devāḥ //

2.8.9.9

téna vayáṃ bhágavantaḥ syāma /
táṃ tvā bhaga sárva ít_ johavīmi /
sá no bhaga pura etā́ bhava_ihá /
sám adhvarā́ya_uṣáso namanta /
dadhikrā́vā_iva śúcaye padā́ya /
arvācīnáṃ vasuvídaṃ bhágaṃ naḥ /
rátham iva_áśvā vājína ā́vahantu /
áśvāvatīr gómatīr na uṣā́saḥ /
vīrávatīḥ sádam ucchantu bhadrā́ḥ /
ghṛtáṃ dúhānā viśvátaḥ prápīnāḥ /
yūyáṃ pāta svastíbhiḥ sádā naḥ //

Commentaries (4)

Linked texts (33)