Taittiriyabrahmana 3.7.3
Taittirīyabrāhmaṇa 3.7.3
- Language
- Sanskrit
3.7.3.1
ví vā́ eṣá indriyéṇa vīryèṇa_ṛdhyate /
yásya_ā́hitāgner agnír mathyámāno ná jā́yate /
yátrānyáṃ páśyet /
táta āhṛ́tya hotavyàm /
agnā́v evā́syāgnihotrám̐ hutáṃ bhavati /
yády anyáṃ ná vindét /
ajā́yām̐ hotavyàm /
āgneyī́ vā́ eṣā́ /
yád ajā́ /
agnā́v evā́syāgnihotrám̐ hutáṃ bhavati //
3.7.3.2
ajásya tú nā́śnīyāt /
yád ajásyāśnīyā́t /
yā́m evā́gnā́v ā́hutiṃ juhuyā́t /
tā́m adyāt /
tásmād ajásya ná_āśyam /
yády ajā́ṃ ná vindét /
brāhmaṇásya dákṣiṇe háste hótavyàm /
eṣá vā́ agnír vaiśvānaráḥ /
yád brāhmaṇáḥ /
agnā́v evā́syāgnihotrám̐ hutáṃ bhavati //
3.7.3.3
brāhmaṇáṃ tú vasatyài nā́parundhyāt /
yád brāhmaṇáṃ vasatyā́ aparundhyā́t /
yásminn evā́gnā́v ā́hutiṃ juhuyā́t /
táṃ bhāgadhéyena vyàrdhayet /
tásmād brāhmaṇó vasatyài nā́parúdhyáḥ /
yádi brāhmaṇáṃ ná vindét /
darbhastambé hotavyam /
agnivā́n vái darbhastambáḥ /
agnā́v evā́syāgnihotrám̐ hutáṃ bhavati /
darbhā́m̐s tú nā́dhyāsīta //
3.7.3.4
yád darbhā́n adhyā́sīta /
yā́m evā́gnā́v ā́hutiṃ juhuyā́t /
tā́m ádhyāsīta /
tásmād darbhā́ nā́dhyāsitavyā̀ḥ /
yádi darbhā́n ná vindét /
apsú hotavyàm /
ā́po vái sárvā devátāḥ /
devátāsv evā́syāgnihotrám̐ hutáṃ bhavati /
ā́pas tú ná páricakṣīta /
yád āpaḥ paricákṣīta //
3.7.3.5
yā́m evā́psv ā́hutiṃ juhuyā́t /
tā́ṃ páricakṣīta /
tásmād ā́po ná paricákṣyāḥ /
médhyā ca vā́ etásyāmedhyā́ ca tanúvau sám̐sṛjyete /
yásya_ā́hitāgner anyáir agníbhir agnáyaḥ sam̐sṛjyánte /
agnáye vívicaye puroḍā́śam aṣṭā́kapālaṃ nírvapet /
médhyāṃ ca_evā́syāmedhyā́ṃ ca tanúvau vyā́vartayati /
agnáye vratápataye puroḍā́śam aṣṭā́kapālaṃ nírvapet /
agním evá vratápatim̐ svéna bhāgadhéyena_úpadhāvati /
sá eváinaṃ vratám ā́lambhayati //
3.7.3.6
gárbham̐ srávantam agadám akaḥ /
agnír índras tváṣṭā bṛ́haspátiḥ /
pṛthivyā́m ávacuścota_etát /
nā́bhí prā́pnoti nírṛtiṃ parācáiḥ /
réto vā́ etád vā́jinam ā́hitāgneḥ /
yád agnihotrám /
tád yát srávet /
réto 'sya vā́jinam̐ sravet /
gárbham̐ srávantam agadám akar íty āha /
réta evā́smin vā́jinaṃ dadhāti //
3.7.3.7
agnír íty āha /
agnír vái retodhā́ḥ /
réta evá tád dadhāti /
índra íty āha /
indriyám evā́smin dadhāti /
tváṣṭā_íty āha /
tváṣṭā vái paśūnā́m mithunā́nām̐ rūpakṛ́t /
rūpám evá paśúṣu dadhāti /
bṛhaspátir íty āha /
bráhma vái devā́nāṃ bṛ́haspátiḥ /
bráhmaṇā_evā́smai prajā́ḥ prájanayati /
pṛthivyā́m ávacuścota_etád íty āha /
asyā́m evá_enat prátiṣṭhāpayati nā́bhí prā́pnoti nírṛtiṃ parācáir íty āha /
rákṣasām ápahatyai //
Commentaries (1)
- Taittirīyabrāhmaṇabhāṣya (Sāyaṇa) — Sāyaṇa, Sanskrit
Linked texts (1)
- Āpastambaśrautasūtra — Āpastamba, Sanskrit