Taittiriyabrahmana 3.8.11.2

3.8.11.2

ádityai svā́hā_ádityai mahyài svā́hā_ádityai sumṛḍīkā́yai svā́hā_íty āha /
iyáṃ vā́ áditiḥ /
asyā́ eváinaṃ pratiṣṭhā́ya_údyacchate //
sárasvatyai svā́hā sárasvatyai bṛhatyài svā́hā sárasvatyai pāvakā́yai svā́hā_íty āha /
vā́g vái sárasvatī /
vācā́_eváinam údyacchate //
pūṣṇé svā́hā pūṣṇé prapathyā̀ya svā́hā pūṣṇé naráṃdhiṣāya sváhā_íty āha /
paśávo vái pūṣā́ /
paśúbhir eváinam údyacchate //
tváṣṭre svā́hā tváṣṭre turī́pāya svā́hā tváṣṭre pururū́pāya svā́hā_íty āha /
tváṣṭā vái paśūnā́ṃ mithunā́nām̐ rūpakṛ́t /
rūpám evá paśúṣu dadhāti /
átho rūpáir eváinam údyacchate //
víṣṇave svā́hā víṣṇave nikhuryapā́ya sváhā víṣṇave nibhūyapā́ya svā́hā_íty āha /
yajñó vái víṣṇuḥ /
yajñā́ya_eváinam údyacchate /
pūrṇāhutím uttamā́ṃ juhoti /
prátyúttabdhyai sayatvā́ya //