Taittiriyakathaka 3.23

3.23

lo̱ko̍si bha̱rtā tam | tapa̱stejo̍si bha̱rtṛ tat
sa̱mu̱dro̍si bha̱rtā tam | āpa̍sstha bha̱rtrya̍stā va̍:
pṛ̱thi̱vī bha̱rtrī tām | a̱gni̱ra̍si bha̱rtā tam | a̱ntari̍kṣaṃ bha̱rtṛ tat | vā̱yu̱ra̍si bha̱rtā tam | dyau̱ra̍si
bha̱rtrī tām | ā̱di̱tyaśca̱ndramā̍ bha̱rtā tam | nakṣa̍trāṇi stha bha̱rtṛ̍ṇi tā̱ni̍ vaḥ | sa̱ṃva̱thsa̱ro̍si bha̱rtā
tam | ṛ̱tavo̱ māsā̍ ardhamā̱sā bha̱rtāra̱stān va̍ṃ
a̱ho̱rā̱tre bha̱rtryau te vā̍m | pau̱rṇa̱mā̱sī bha̱rtryaistā
va̍ṃ | rāḍa̍si bha̱rtrī tām | ojo̍si bha̱rtā tameka̍vim̐śatiḥ
'tvama̍gne ru̱dro asu̍ro ma̱ho di̱vaḥ | tvam̐ śardho̱
māru̍taṃ pṛ̱kṣa ī̍śiṣe | tvaṃ vātai̍raru̱ṇairyā̍si śaṃgu̱yaḥ
tvaṃ pū̱ṣā vi̍dha̱taḥ pā̍si̱ nu tmanā̍ | de̱vā̍ de̱veṣu̍ śrayadhvam | pratha̍mā dvi̱tīye̍ṣu śrayadhvam | dvi̱tīyā̍stṛtīye̍ṣu śrayadhvam | tṛ̱tīyā̍ścatu̱rtheṣu̍ śrayadhvam | ca̱tu̱rthāḥ pa̍ṃñca̱meṣu̍ śrayadhvam | pa̱ñca̱māṣṣa̱ṣṭheṣu̍ śrayadhvam
22|| ṣa̱ṣṭhāssa̍pta̱meṣu̍ śrayadhvam | sa̱pta̱mā a̍ṣṭa̱meṣu̍
śrayadhvam | a̱ṣṭa̱mā na̍va̱meṣu̍ śrayadhvam | na̱va̱mā da̍śa̱meṣu̍ śrayadhvam | da̱śa̱mā ekā̍da̱śeṣu̍ śrayadhvam
ekā̍da̱śā dvā̍da̱śeṣu̍ śrayadhvam | dvā̱da̱śā trayo̍da̱śeṣu̍
śrayadhvam | trayo̍da̱śāścatu̍rda̱śeṣu̍ śrayadhvam | catu̍rdaśāḥ pa̍ñcada̱śeṣu̍ śrayadhvam | pa̱ñca̱da̱śāṣṣo̍ḍa̱śeṣu̍ śrayadhvam