Katha Upanishad 5.2

5.2

sa tu naikapuravartyevātmā kiṃ tarhi sarvapuravartī | katham ? haṃsaḥ hanti gacchatīti | śuciṣat śucau divi ādityātmanā sīdatīti | vasuḥ vāsayati sarvāniti | vāyvātmanā antarikṣe sīdatīti antarikṣasat | hotā agniḥ, 'agnirvai hotā' iti śruteḥ| vedyāṃ pṛthivyāṃ sīdatīti vediṣat, ' iyaṃ vediḥ paro'ntaḥ pṛthivyāḥ' iti mantravarṇāt | atithiḥ somaḥ san duroṇe kalaśe sīdatīti duroṇasat | brāhmaṇo'tithirūpeṇa vā duroṇeṣu gṛheṣu sīdatīti duroṇasat | nṛṣat nṛṣu manuṣyeṣu sīdatīti nṛṣat | varasat vareṣu deveṣu sīdatīti varasat | ṛtasat ṛtaṃ satyaṃ yajño vā, tasmin sīdatīti ṛtasat | vyomasat vyomni ākāśe sīdatīti vyomasat | abjāḥ apsu śaṅkhaśuktimakarādirūpeṇa jāyata iti abjāḥ | gojāḥ gavi pṛthivyāṃ vrīhiyavādirūpeṇa jāyata iti gojāḥ | ṛtajāḥ yajñāṅgarūpeṇa jāyata iti ṛtajāḥ | adrijāḥ parvatebhyo nadyādirūpeṇa jāyata iti adrijāḥ | sarvātmāpi san ṛtam avitathasvabhāva eva | bṛhat mahān, sarvakāraṇatvāt | yadāpyāditya eva mantreṇocyate tadāpyātmasvarūpatvamādityasyāṅgīkṛtamiti brahmaṇi vyākhyāne'pyavirodhaḥ | sarvathāpyeka evātmā jagataḥ, nātmabheda iti mantrārthaḥ ||