Pramāṇa · Search · About · API

Mahaitareya 32.p32

Mahaitareya 32.p32

Language
Sanskrit

32.p32

atha khalviyaṃ sarvasyai vāca upaniṣat sarvā hyevemāḥ sarvasyai vāca upaniṣada imāṃ tvevā'cakṣate || pṛthivyā rūpaṃ sparśā antarikṣasyoṣmāṇo divaḥ svarā agne rūpaṃ sparśā vāyorūṣmāṇa ādityasya svarā ṛgvedasya rūpaṃ sparśā yajurvedasyoṣmāṇaḥ sāmavedasya svarāścakṣuṣo rūpaṃ sparśāḥ || śrotrasyoṣmāṇo manasaḥ svarāḥ prāṇasya rūpaṃ sparśā apānasyoṣmāṇo vyānasya svarāḥ || atha khalviyaṃ daivī vīṇā bhavati tadanukṛtirasau mānuṣī vīṇā bhavati || yathā'syāḥ śira evamamuṣyāḥ śiro yathā'syā udaramevamamuṣyā ambhaṇaṃ yathā'syai jihvaivamamuṣyai vādanam || yathā'syāstantraya evamamuṣyāḥ sparśāḥ yathā hyeveyaṃ śabdavatī tarhyavatyevamasau śabdavatī tarhyavatī || yathā hyeveyaṃ lomaśena carmaṇā pihitā bhavatyevamasau lomaśena carmaṇā pihitā lomaśena ha smavai carmaṇā purā vīṇā apidadhāti sa yo haitāṃ daivīṃ vīṇāṃ veda || śrutavadano bhavati bhūmiprāḍasya kīrtirbhavati yatra ka cāryā vāco bhāṣante vidurenaṃ tatra

Linked texts (2)