Kathakagrihyasutra 31.3.1

31.3.1

etaistribhiḥ pitṛpitāmahaprapitāmahānāṃ trīnpiṇḍān nivṛṇāti mantraliṅgāt | agnivāyusūryāścātra lokatrayasthāḥ pitrāditvena bhāvyante, piṇḍeṣu ca pṛthivyādibuddhiḥ kriyate || iyaṃ pṛthivī durvirevānnasādhanatvasāmānyāt dārayati vā doṣān karmādyanuṣṭhānadvāreṇa viduṣāmiti durviḥ pṛthivī akṣitā avināśinī itaradurvidilakṣaṇā, tṛptiḥ prītihetutvāt, svadhā prathamapiṇḍarūpā pṛthivī, anupadstā 'dasu upakṣaye' anupahiṃsitā, tāṃ pṛthivīṃ durvimakṣitāṃ tṛptiṃ svadhāmanupadstāṃ pṛthivīṃ prathamapiṇḍarūpāṃ upajīva bhuṅkṣva he pitaḥ | ka iva | agniriva, yathā agniḥ pṛthivīmupajīvati bhaumastadadhipatitvāt, tadvat | ye cātra tvānu, ye cātra paraloke tvāmanu sthitāḥ tava anucarabhūtāḥ, te'pyupajīvantu piṇḍametat sānucara upajīvetyarthaḥ | eṣā svadhā bhavatviti śeṣaḥ || anenaivetarau gatārthau | antarikṣaṃ durvistamaso vidāraṇādannasādhanatvādvā | dyaurdurvirduḥkhanivāraṇāt svargasya niratiśayasukhātmakatvāt ||