Kathakagrihyasutra 4.1

4.1

janmanaḥ prabhṛti ṣoḍaśe varṣe vartamāne brahmacāriṇā godānasaṃjñakaṃ vrataṃ kartavyam | yastvaritaṃ dārasvīkārārthī | asmādūrdhvaṃ snātvā dārakarmocyate | yastu sarvakālaṃ vedamadhītya vivāhaṃ cikīrṣati tasyopanayanādārabhya ṣoḍaśe varṣe godānam | ‘trivedyāṃ hyaṣṭācatvāriṃśadvarṣāṇi brahmacaryaṃ caraṇīyam’ iti pakṣaḥ | tadekavedagrahaṇe ṣoḍaśa saṃvatsarā bhavanti tribhāgena | yasya tvāpatkālena ṣoḍaśe varṣe bhavatyupanayanaṃ tasyāgnau samāpte godānavratam , agryadhyayane samāpta ityarthaḥ | yo'pi vaidaikadeśamadhītya snāsyati tasyāpyeṣa pakṣo'gnau samāpta iti | taccaitatkeśāntikāparaparyāyaṃ godānavrataṃ jaṭākarmaṇā vyākhyātaṃ
śikhākarmaṇetyarthaḥ | atrāpi hyupasamādhānādikṣurakarmāntaṃ samam |