Paraskaragrihyasutra 24.32.1

24.32.1

( veda samāpya snāyādbrahmacaryaṃ vā'ṣṭācatvāriṃśakam ) vedaṃ maṃtrabrāhmaṇātmakaṃ samāpya samyak pāṭhato'rthataśca aṃtaṃ nītvā snāyādvakṣyamāṇena vidhinā snānaṃ kuryāt | athavā brahmacaryaṃ vratamaṣṭācatvāriṃśakamaṣṭācatvāriṃśadvarṣaṃ nirvartya samāpya avasānaṃ prāpayya guruṇā'numataḥ snāyāditi gatena saṃbaṃdhaḥ ( dvādaśake'pyeke ) eke sūtrakārāḥ dvādaśake'pi dvādaśavarṣasamāpye'pi vrate carite snāyāditi manyaṃte | tatrāpi ( guruṇā'nujñātaḥ ) atrāsūtritamapi ubhayaṃ vedaṃ vrataṃ ca samāpya vā snāyādityanuṣajyate | yataḥ pūrvaṃ snātakasya traividhyamuktam (vidhirvidheyastarkaśca vedaḥ ) vedaṃ samāpyetyuktaṃ tatra kiyān veda ityapekṣāyāmāha | vidhiḥ vidhīyate iti vidhiḥ agnimādadhīta iti agnihotraṃ juhuyāt jyotiṣṭomena svargakāmo yajetetyādi vidhāyakaṃ brāhmaṇavākyaṃ, vidheyaḥ vidhīyate viniyujyate brāhmaṇavākyena karmāṅgatveneti vidheyo mantra iṣe tvādiḥ | [ vidhirvidheyastarkaśca vedaḥ yadatraitasmindarśane sati samastavaidikasaṃhārātmikā mīmāṃsā'pi vedaśabdavācyā bhavatītyādinā tarkapadaṃ mīmāṃsāparamaṃgīkṛtya vārtikakāritayā mīmāṃsāyā api vedatvamuktaṃ tadvidhyāditrayasya vedatvapratipādanārtheyaṃ smṛtiriti ṣaḍaṃgavedatvasmṛtitulyanyāyatayā pūrvapakṣasaṃmatābhyupagamenaiva taddṛṣṭāṃtena kalpasūtrāṇāṃ chaṃdastvābhāvamupapādayituṃ, natvevameva smṛtivyākhyānaṃ saṃmatam, adhyetṝṇāṃ mīmāṃsāyāṃ vedaśabdāprasiddheḥ |