Paraskaragrihyasutra 24.32.2

24.32.2

na cādhyetṛprasiddhinirapekṣaiveyaṃ smṛtirviṃdhyāditrayasya vedatvaṃ pratipādayatīti vācyam, tathā sati tannirapekṣyeṇa smṛtimātraparyālocane tatsvārasyena vidhyuddeśamātrasyaiva vedatvāpattāvarthavādādīnāmavedatvāpatteḥ | vidheyatvamagnihotranyāyavistarayorapi vedatvāpatteśca | athādhyetṛprasiddhadyanurodhena vidhividheyaśabdayorbrāhmaṇamaṃtraparatvānnāvyāptyativyāptī | tarhi smṛteradhyetṛprasiddhisāpekṣatvāpattau kathaṃ tarkapadaprasiddhavedatvapratipādanaparatā | na ca tadaṃśe svātaṃtryam, apekṣānapekṣāvidhyanuvādakṛtavairūpyāpatteḥ nyāyavistarātiprasaṃgānivṛtteśca vyavahārānupraviṣṭapadārthanirṇaye tadvirodhena śāstrasyāsāmarthyācca | tasmādadhyetṛprasiddhasyaiva maṃtrabrāhmaṇātmakasya vedasya kaścidvidhinā'ṅgavidhāyakaḥ kaścinmaṃtrātmako vidheyaḥ kaścitsa eṣa neti neti traiyaṃbakāḥ puroḍāśā ityādiṣvaividhyamanayaivocyata iti tāttviko'rthaḥ | ataḥ ṣaḍaṃgā eva vedasmṛtirapi paramatopanyāsāt pūrvapakṣasmṛtirevetyalam | ] tarko'rthavāda iti karkopādhyāyaḥ | yathā aktāḥ śarkarā upadadhāti iti vidhiḥ śrūyate tatrāṃjanasādhanaṃ ghṛtaṃ tailaṃ vasā ca tanmadhye kenāktā iti saṃśaye tejo vai ghṛtamiti arthavādāt ghṛtenāktā iti nirṇīyate | atastarko'rthavādaḥ | tarko mīmāṃseti kalpatarukāraḥ | cakārānnāmadheyabhāgasaṃgrahaḥ yato vedo vidhyarthavādamaṃtranāmadheyabhedaiścaturdhā mīmāṃsakairvicāryate | yathā agnihotrādhārau yāgabhedau udbhidbalabhiditi nāmadheyāni | ( ṣaḍaṃgameke ) eke sūtrakārāḥ ṣaḍaṃgaṃ vedaṃ samāpya snāyādityāhuḥ |