Paraskaragrihyasutra 24.32.4

24.32.4

snāyādityuktaṃ tatra kathaṃ snāyādityapekṣite āha upasaṃgṛhya upasaṃgrahaṇavidhinā praṇamya, kaṃ gurumācāryaṃ, samidhaḥ pūrvoktalakṣaṇāstisraḥ parisamūhanādi tryāyuṣakaraṇāṃtena vidhinā ācāryanirvarttitasamāvarttanāṃgahome'gnau ādhāya prakṣipya | atra samidho'bhyādhāyetyuktaṃ tatsamidādhānaṃ kiṃ vedāhutyādisamāvarttanahomātpūrvamuta paścāt | vedāhutihomaḥ kutaḥ prāpta iti cet etadeva vratādeśanavisargeṣvityatideśāt | tarhi pūrvaṃ bhavatu | upasaṃgṛhya guruṃ samidho'bhyādhāyeti pāṭhāt samidādhānānaṃtaraṃ vedāhutīnāmavasara iti gamyate | naitadevaṃ, śrutyā hi vedāhutīnāmavasaraḥ samidādhānātpūrvaṃ, samidādhānaṃ ca snānātpūrvamiti kramasya jñāpitatvāt | kathaṃ ? sa yāmupayan samidhamādadhāti sā prāyaṇīyā yā snāsyansodayanīyeti śruteḥ | tasmātsamāvarttanahomānte upasaṃgrahaṇādi | pariśritasya pariveṣṭitasya sarvataḥ pracchāditasya samāvarttanāṃgahomasādhanāgnisyāpanapradeśasya uttarataḥ uttarasmin bhāge kuśeṣu prāgagreṣu prākkūleṣu āstīrṇeṣu, kva purastātprācyāṃ diśi, keṣāmaṣṭānāmudakuṃbhānāṃ dakṣiṇottarāyatānāmaṣṭasaṃkhyākānāmamalajalapūrṇānāmāsrādiśubhapallavamukhānāṃ sthitvā sthitiṃ kṛtvā ūrdhvobhūyetyarthaḥ | ye apsrvaṃtaragnaya ityādinā maṃtreṇa iha gṛhṇāmītyantena ekasmātprathamātikrame kāraṇābhāvāditi nyāyena prathamāt prāṃcyudaṃci ca vivāhakarmāṇītyanena nyāyena dakṣiṇasya prathamatvam, apaḥ jalaṃ dakṣiṇahastena gṛhītvā tena jalena abhiṣiṃcate abhyukṣati śirastaḥ snānakarttā''tmānam | tatra maṃtraḥ | tena māmabhiṣiṃcāmi ityādirbrahmavarcasāyetyaṃtaḥ |