Paraskaragrihyasutra 6.4.2

6.4.2

kiṃca vacanābhāve paraḥ parasya karma kartuṃ na pravartate nātra vacanamasti pākayajñeṣu svato'nyakartṛtvavidhāyakam | śrautavatsamākhyāpi nāsti | nanu smṛtīnāṃ vedamūlatvāt yadvedamūlaṃ smārtaṃ karma tadvedasamākhyayā anyasya kartṛtvaṃ kalpyatām | maivam | yataḥ smṛtayo'niścitavedamūlāḥ ato na jñāyate kiṃvedamūlamidaṃ karma, yadvedasamākhyayā anyaḥ kartā kalpyate | mantraliṅgavirodho'pi parakartṛtve, kathaṃ-sā māmanuvratā bhava, prajāpatiṣṭhā niyunaktu mahyam, amohamasmītyādi sā naḥ pūṣāśivatametyādayo vaivāhikamantrāḥ ātmaliṅgāste ca parakartṛtve viruddhayante tasmātpākayajñeṣu svayaṃ yajamānasyaiva kartṛtvamiti siddham | atra varo'pi vāsasī paridhatte paridhāsyai yaśasāmeti mantrābhyām | 'athainau……nāviti' atha vastraparidhānānantaraṃ parasparaṃ samañjethāmiti praiṣeṇa kanyāpitā enau vadhūvarau samañjayati saṃmukhau varakumāryau karoti | atra viśeṣamāha ṛṣyaśrṛṅgaḥ "varagotraṃ samucārya prapitāmahapūrvakam | nāma saṃkīrtayedvidvānkanyāyāścaivameva hi" tatra varaḥ-samañjantu viśvedevā ityādikaṃ mantraṃ kanyāsaṃmukhībhūtaḥ paṭhati | atra kanyādānaprayogo likhyate, uttaratra pitrā prattāmiti sūtrasmaraṇāt | tadyathā amukagotrasyāmukapravarasyāmukaśarmaṇaḥ prapautrāya amukagotrasyāmukapravarasyāmukaśarmaṇaḥ pautrāya amukagotrasyāmukapravarasyāmukaśarmaṇaḥ putrāya iti varapakṣe amukagotrasyāmukapravarasyāmukaśarmaṇaḥ prapautrīm, amukagotrasyāmukapravarasyāmukaśarmaṇaḥ pautrīm, amukagotrasyāmukapravarasyāmukaśarmaṇaḥ putrīm, iti kanyāpakṣe |