Vaikhanasasmartasutra 1.6.1

1.6.1

atha niṣekādisaṃskārāṇāṃ prāyaścittaṃ vyākhyāsyāmaḥ snātvā saṃkalpya puṇyāhe vidhivatsaṃskārānkuryāt caturdiśaṃ caturhastaṃ gocarmetyuktaṃ gocarmamātropalipte pūrvavadagniṃ nidhāyābhimukhamāsīnamagniṃ dhyātvādhāraṃ juhuyāt sarvasyādāvāghāre kriyālope viparyāse ca vyāhṛtīrmahāvyāhṛtīrgāyatrīṃ sāvitrīṃ mindāhutī vaiṣṇavaṃ ca dvirāvartya hutvā punarāghāraṃ juhoti sthaṇḍile paristaraṇādisaṃbhāre ca pramāṇavarjite hīne mindāhutī sāvitrīṃ vyāhṛtīśca juhuyāt ṛtvijorabhāve dakṣiṇottarayoḥ prāgagraṃ kūrcaṃ nidhāya brahmasomau saṃkalpayati sarvaṃ yugmaṃ prācyāmudīcyāṃ vāgramantaṃ ca daivike karoti sarvamayugmaṃ dakṣiṇasyāṃ paścimasyāṃ vāgramantaṃ ca paitṛke karoti home nyūne 'tirikte ca pūrṇāhutī mindāhutī juhoti viśeṣe 'nukte sruveṇa hotavyamājyaṃ havirvyāhṛtirmantraṃ prāyaścitte 'nukte vaiṣṇavaṃ prāyaścittamagnāvājye carau vā home makṣikakrimiromapipīlikādipatane tadvyapohya barhiṣoddīpya prājāpatyamāgneyamagnyāyatane govarāhaśvasarpamaṇḍūkamārjārādyairgamane tatpadānīdaṃ viṣṇuriti prokṣya vaiṣṇavaṃ raudraṃ ca paristaraṇādisambhārāṇāṃ dāhe bhede cchede nāśe ca tattatsthāne saṃyojya mindāhutī dvirāvartya juhuyāt āghāre kṛte tasminnagnau samutsanne 'gniṃ dhyātvā tadbhasmāyaṃ te yoniriti samidhamāropyodbudhyasveti laukikāgnau samidhaṃ nidhāyojjvālya pariṣicya mano jyaotirayāścāgne mindāhutī vyāhṛtīśca juhuyāt sarvahomānāmante sviṣṭakṛtprabhṛtyantahome hīne viṣṇornukādimindāhutyāśrāvitādīñjuhuyāt \1\