Vaikhanasasmartasutra 1.6.2

1.6.2

ṛtau saṃgamanaṃ niṣekamityāhuḥ svabhāryāyāmṛtusnātāyāṃ ṣoḍaśāhe saṃgamane hīne 'gnimādhāyāghāraṃ hutvā vaiṣṇavaṃ brāhmamaindramāgneyaṃ dadbhyaḥ svāhetyaṅgahomaṃ jayānabhyātānānrāṣṭrabhṛto hutvāntahomaṃ juhoti snātāmalaṃkṛtāṃ bhāryāṃ pūrvavadgacchet ṛtau prathame homaṃ juhuyāt ṛtāvṛtau saṃgamanaṃ karoti tataḥ sā bhāryā garbhamādhāya putraṃ janayati putreṇa pitaraḥ prītā bhavanti tenaiva svargaṃ gacchanti tasyāṃ putrahīnāyāṃ putrārthamanyāṃ vivāhaṃ kuryāt yasya bhāryā pativrata putravatī sādhvī sa sarvāṃ siddhimāpnoti tasmādduṣṭāmasādhvīṃ bāndhavasaṃnidhau tyaktvānyāmupayacchet garbhādhānādisaṃskāreṣu nāndīmukhe 'bhyudayaśrāddhe hīne daivikaina sahaikāhe paitṛkavatkṛte ca tatkāryamaśubhaṃ bhavati tasmātpūrvadyurdaivikavatkuryāt dvau viśvedevau caturaḥ pit.ṝnbrāhmaṇānvarayitvā nāndīmukhāḥ pitaraḥ priyantāmiti haste yavodakaṃ dattvāghārānte pūrvavaddhomaṃ hutvānte brāhmaṇānbhojayedudyantaṃ vā dadātyanyathā nāndīmukhaṃ kṛtvā punaḥ śubhakarma kuryāt jātakarmotthānayornāndīmukhaṃ varjayedityeke \2\