Vaikhanasasmartasutra 1.6.4

1.6.4

kumārasya kumāryāśca janane sapiṇḍanāṃ daśāhamāśaucaṃ vidhīyate puruṣasya sapiṇḍatā ṣaṣṭhapuruṣāvadhiḥ kanyāyāstripuruṣāvadhirbhavati āśauce sūtake pretake ca sandhyopāsanādinityakarmāṇyanyāni daivikapaitṛkāṇi svādhyāyadānapratigrahāṇi ca varjayati kumāre jāte jātakāgnau prātarhome hīne vyāhṛtīścaturāvartya hutvā sāyaṃ dviguṇaṃ sāyaṃ hīne prātardviguṇaṃ pūrvavadā daśāhājjuhotyatīte 'pyevaṃ jātakarma kuryāt jātakāgnau samutsanne tadbhasma pūrvavatsamidhamāropya laukikāgnau nidhāya prāyaścittaṃ hutvā tathaiva juhuyāt daśame 'hani jātakāgnimaraṇyāmidhme vā samāropya tamevāgniṃ mathitvādhāya vāstuhomotthānahomau hutvāgniṃ samāropyāpramādaṃ nidadhāti utthānasya kāle 'tīte vaiṣṇavaṃ brāhmaṃ raudraṃ prāyaścittaṃ hutvā pūrvavatkuryānnāmakaraṇasya vaiṣṇavaṃ mūlahomaṃ yaddevādidigdaivatyaṃ ca hutvā nāmakaraṇaṃ karoti \4\