Vedamrita 7.10

7.10

saṃ va̍pāmi samāpo̍ a̱dbhira̍gman samāṣa̍dhayo rase̍na̱ sam̐
re̱vatī̱rjaga̍tībhi̱rmadhu̍matī̱rmadhu̍matībhiḥ sṛjyadhvama̱mbyaḥ pari̍ prajā̍tāḥ stha̱ sama̱dbhiḥ pṛ̍cyadhvaṃ jana̍yatyai tvā̱ saṃ yau̍mya̱gnaye̍ tvā'gnīṣomā̍bhyāṃ ma̱khasya̱ śiro̍'si gha̱rmo̍si viśvā̱yuru̍ru̱ pratha̍svo̱ru
ta ya̱jñapa̍tiḥ prathatāṃ tvaca̍ṃ gṛhṇīṣvāntari̍ta̱m̐ rakṣo̱'ntari̍tā
arā̍tayo de̱vastvā̍ savi̱tā śra̍payatu vaṣi̍ṣṭhe̱ adhi̱ nāke̍'gniste̍
ta̱nuva̱ṃ mā'ti̍ dhāgagne̍ ha̱vyam̐ ra̍kṣa̱sva saṃ brahma̍ṇā pṛcyasvaikatāya̱ svāhā̍ dvi̱tāya̱ svāhā̍ tri̱tāya̱ svāhā̍ (1)
ā da̍da̱ indra̍sya bā̱hura̍si dakṣi̍ṇaḥ sa̱hasra̍bhṛṣṭiḥ śa̱tate̍jā
vā̱yura̍si ti̱gmate̍jāḥ pṛthi̍vi deva̱yaja̱nyoṣa̍dhyāste̱ mūla̱ṃ mā
him̐̍si̱ṣamapa̍hato̱'ru̍ḥ pṛthi̱vyai vra̱jaṃ ga̍ccha go̱sthāna̱ṃ varṣa̍tu te
dyaurba̍dhāna deva savitaḥ para̱masyā̍ṃ pa̱rāvati̍ śa̱tena̱ pāśai̱ryo'smānddveṣṭi̱ yaṃ ca̍ va̱yaṃ dvi̱ṣmastamato̱ mā mau̍gapa̍hato̱'ruḥ pṛthi̱vyai
dai̍vya̱janyai̍ vra̱jam (1) ga̍ccha go̱sthāna̱ṃ varṣa̍tu te̱ dyaurba̍dhāna
de̍va savitaḥ para̱masyā̍ṃ parā̱vati̍ śa̱tena̱ pāśai̱ryo'smāndveṣṭi̱ yaṃ ca̍
va̱yaṃ dvi̱ṣmastamato̱ mā mau̍gapa̍ha̱to'ru̍ḥ pṛthi̱vyā adai̍vayajano
vra̱jaṃ ga̍ccha go̱sthāna̱ṃ varṣa̍tu te̱ dyaurba̍dhāna de̍va savitaḥ para̱masyā̍ṃ
parā̱vati̍ śa̱tena̱ pāśai̱ryo'smāndveṣṭi̱ yaṃ ca̍ va̱yaṃ dvi̱ṣmastamato̱ mā
(2) mau̍ga̱raru̍ste̱ diva̱ṃ mā skānvasu̍vastvā̱ pari̍ gṛhṇantu
gāya̱treṇa̱ chanda̍sā ru̱drāstvā̱ pari̍ gṛhṇantu traiṣṭu̍bhena̱ chanda̍sā''di̱tyāstvā̱ pari̍ gṛhṇantu jāga̍tena̱ chanda̍sā de̱vasya̍ savituḥ sa̱ve
karma̍ kṛṇvanti vedhasa̍ ṛ̱tama̍dya̱ sada̍namasyamṛtaśrīra̍si̱ dhā a̍si
sva̱dhā a̍syu̱rvī cā̍si̱ vasvī̍ cāsi pu̱rā krū̱rasya̍ vi̱sṛpo̍
vira̍pśinnu̱dādāya̍ pṛthi̱vīṃ jī̱radā̍nu̱rmereya̱ścandrama̍si sva̱dhābhi̱stāṃ dhīrā̍so anu̱dṛśya̍ yaja̱nte (3)
daśamo'nuvākaḥ