Vedamrita 7.10-2

7.10-2

pratyu̍ṣṭa̱m̐ rakṣa̱ḥ pratyu̍ṣṭā arā̍tayo'gne̍sta̱nve̍ji̱ṣṭhena̱ teja̍sā
niṣṭṛ̍pāmi go̱ṣṭhaṃ mā nirmṛ̍kṣaṃ vā̱jina̍ṃ tvā sapatna̱sāha̱m̐ sa
mārji̱ṃ vāca̍ṃ prā̱ṇaṃ cakṣu̱ḥ śrotra̍ṃ pra̱jāṃ yoni̱ṃ mā nirmṛ̍kṣaṃ
vā̱jinī̍ṃ tvā sapatna̱sāhī̱m̐ saṃ mā̍rjmyāśāsā̍nā saumana̱saṃ
pra̱jām̐ saubhā̍gyaṃ ta̱num | a̱gneranu̍ vra̱tā bhū̱tvā saṃ na̍hye sukṛ̱tāya̱
kam | su̱pra̱jasa̍stvā va̱yam̐ su̱patnī̍rupa̍ (1) sedi̱ma | agne̍
sapatna̱dambha̍namada̍bdhāso adā̱bhyam | i̱maṃ vi ṣyā̍mi̱ varu̍ṇasya̱
pāśa̱ṃ yamava̍dhnīta savi̱tā su̱keta̍ḥ | dhā̱tuśca̱ yonau̍ sukṛ̱tasya̍ lo̱ke
syo̱naṃ me̍ sa̱ha patyā̍ karomi | samāyu̍ṣā saṃ pra̱jayā̱ sama̍gne
varca̍sā̱ puna̍ḥ | saṃ patnī̱ patyā̍'haṃ gaccha̱ samā̱tmā ta̱nuvā̱ mama̍
ma̱hīnāṃ payo̍'syoṣa̍dhīnām̐ ra̱sastasya̍ te'kṣīyamāṇasya̱ niḥ
(2) vapāmi ma̱hīnāṃ payo̍'syoṣa̍dhī̱nām̐ raso̍'dabdhena tvā̱
cakṣuṣā've̍kṣe suprajā̱stvāya̱ tejo̍'si̱ tejo̱'nu prehya̱gniste̱ tejo̱
mā vi naida̱gnerji̱hvā'si̍ su̱bhūdde̱vānā̱ṃ dhāmne̍dhāmne de̱vebhyo̱ yaju̍ṣeyajuṣe bhava śu̱krama̍si̱ jyoti̍rasi̱ tejo̍'si de̱vo va̍ḥ savi̱totpu̍nātvacchi̍dreṇa pa̱vitre̍ṇa̱ vaso̱ḥ sūrya̍sya ra̱śmibhi̍ḥ śu̱kraṃ tvāṃ
śu̱krāyā̱ṃ dhāmne̍dhāmne de̱vebhyo̱ yaju̍ṣeyajuṣe gṛhṇāmi̱ jyoti̍stvā
jyoti̍ṣya̱rcistvā̱'rciṣi̱ dhāmne̍dhāmne de̱vebhyo̱ yaju̍ṣeyajuṣe
gṛhṇāmi (3)
iti daśamo'nuvākaḥ