Basavapuranam 32.13

32.13

p. 128) tato rājā bahuvidhaiḥ stavaistuṣṭāva yoginam .. 96 ..
rudramūrte namaste'stu namaste karuṇātmane ..
sadbhirīḍya namaste'stu pilla vidvannamo'stu te .. 97 ..
jvaraṃ madvāmabhāgasthaṃ samyaṅ mardaya matpitaḥ ..
evaṃ saṃprāthito bhasma vāmabhāge lilepa saḥ .. 98 ..
bhasmadhāraṇamāhātmyādvāmāṃgasthaṃ vinirgatam ..
tataḥ suṃdarapāṃḍyākhyaṃ rājānaṃ sahasā'gamat .. 99 ..
taccharīrasthitā rogāḥ sarve nāśamupāgaman ..
namaścakraturatyantaprītyā tau dampatī tadā .. 100 ..
abhīṣṭavastubhiḥ sarvaiḥ pūjayāmāsaturmunim ..
tataḥ pillastu cārvākān prāha gaṃbhīrayā girā .. 101 ..
prāmāṇyaṃ vedaśāstrāṇāṃ bhavadbhirnorarīkṛtam ..
pratyakṣamātraprāmāṇyavādino hi mahītale .. 102 ..
atastvadiṣṭaṃ pratyakṣaṃ vimṛśadhvaṃ tathāgatāḥ ..
ityuktāste tu pillena saṃvicārya parasparam .. 103 ..
pillaṃ nijagaduḥ sarve śivabhaktaṃ jiteṃdriyam ..
bhavatāmiṣṭamaṃtraṃ ca tathā manmaṃtramuttamam .. 104 ..
hutāśane nikṣipāmo lekhayitvā ca patrayoḥ ..
yatpatrikā na dagdhā syājjayasteṣāṃ bhaveddhruvam .. 105 ..