Basavapuranam 32.14

32.14

p. 129) śrutvaitadvacanaṃ pillo manasītthaṃ vyacintayat ..
tulāpātre suvarṇaṃ ca śvāsthi nikṣipyate yadi .. 106 ..
kā hāniḥ syātsuvarṇasya sarvotkṛṣṭasya bhūtale ..
tathā caṃdanakhaṃḍasya kāṣṭhairbarburasaṃjñakaiḥ .. 107 ..
avasthityā caikadeśe hīnaṃ syānnahi caṃdanam ..
jainalekhaikasaṃsparśācchivamaṃtrasya kā kṣatiḥ .. 108 ..
evaṃ vicārya pillo'yaṃ maunamaṃgīcakāra saḥ ..
ubhābhyāṃ likhitāṃ lekhāṃ rājā cikṣepa pāvake .. 109 ..
jainalekhā vidagdhā'bhūdagniprakṣepamātrataḥ ..
saraḥsthā padminīveyaṃ lekhā śaivī rarāja sā .. 110 ..
nirjitāścāpi te jainā mānāṃtaramakāmayan ..
pravāhamadhye kāveryāṃ nikṣipāmastu patrike .. 111 ..
yā patrikā jalasyāsya pratikūlaṃ hi gacchati ..
jayastasyeti niścitya pramāṇaṃ tatra cakrire .. 112 ..
tenāpi ca pramāṇena nirjitaḥ saugatāstataḥ ..
punaḥ pramāṇakaraṇavyagrānudvīkṣya saugatān .. 113 ..
pillaḥ provāca rājānaṃ tatvanirṇayatatparam ..
punaḥ pramāṇakaraṇe cārvākāśca yataṃti hi .. 114 ..
ye nirjitāśca tatrāpi tān śūleśvadya nikṣipa ..
evamuktāstu ye bauddhāste ca śīghraṃ pradudruvuḥ .. 115 ..