Vastu-shastra (Vol. I: Hindu Science of Architecture; Vol. II: Hindu Canons of Iconography and Painting) v1.c64.16

v1.c64.16

इदानीमप्रशस्तानां भुवां लक्ष्माभिदध्महे ।
पुरादिसन्निवेशार्थं परित्याज्या भवन्ति याः ॥
भस्माङ्गारकपालास्थि तुषकैशविषाश्मभिः ।
मूषकोत्करवल्मीकशर्कराभिश्च निर्भरा ॥
रूक्षा प्ररोहिणी निम्ना भङ्गुरा सुषिरोषरा ।
वामावर्त्तजलस्राविण्यसारा विषमोन्नता ॥
कटुकण्टकिनिःसारशुष्कनिष्फलपादपा ।
क्रव्यात्पक्षिसमाकीर्णा कृमिकीटवती च या ॥
सुकृतान्यपि भोज्यान्नभक्ष्यपानानि तत्क्षणात् ।
यस्यां विनाशमायान्ति सह तूर्यादिनिस्वनैः ॥
सरित् पूर्ववहा यस्यां पुरार्थं तामपि त्यजेत् ।
बहुनापि यतस्तत्र कालेनायाति सा पुनः ॥
वसासृङ्‌मज्जविण्मूत्रमलको (थ?श) पतत्रिणाम् ।
समगन्धां त्यजेदुर्वी तैलस्य च शवस्य च ॥
सदैव धूम्रवर्णा या मिश्रवर्णाथवा मही ।
विवर्णा रुक्षवर्णा वा सा न स्यादिष्टदायिनी ॥
तिक्ताम्ललवणा चापि भूमिर्या स्वेदला भवेत् ।
तां लोकविद्वेषकरीं त्यजेत् पुरनिवेशने ॥
या रुक्षखरसंस्पर्शा सदैवोष्णा हिमाथवा ।
अनिष्टसुखसंस्पर्शा या स्यात् तामपि सन्त्यजेत् ॥
क्रोष्टूष्ट्रखररस्वाना या च निर्भरनिस्वना ।
भिन्नभाण्डसमक्रूरध्वनितापि च नेष्यते ॥
इति गन्धादिभिर्भूमिः कथितेयं शुभाशुभा ।