Rasacandrika p64

p64

adhamo yathā-caturimakalākaṇṭhacchedo manobhavavañcanaṃ dṛṣadi madhuno lipsā loke viḍambanamātmanaḥ | upari paritaḥ saṅkalpānāṃ śilāśatapātanaṃ sahacari ! parītāpasthānaṃ jaḍe hṛdayārpaṇam || mānino madhyame caturasya ca uttame antarbhāvaḥ | mānī yathāvirahaviṣamaḥ kāmo vāmastanuṃ kurute tanuṃ divasagaṇanādakṣaḥ so'yaṃ vyapetaghṛṇo yamaḥ | tvamapi vaśago mānavyādhervicintaya nātha he kisalayatanurjīvatyevaṃ kathaṃ pramadājanaḥ || caturo dvidhā-vacanavyaṅgyasamāgamaśceṣṭāvyaṅgyasamāgamaśceti | ādyo yathā-uddeśo'yaṃ sarasakadalīśreṇiśobhātiśāyī kuñjotkarṣāṅkuritaramaṇīvibhramo narmadāyāḥ | kiṃ caitasmin suratasuhṛdastanvi ! te vānti vātā eṣāmagre sarati kalitākāṇḍakopo manobhūḥ || dvitīyo yathā mama-avāpyāvasthāṃ kathamapi mṛgīcakṣuṣi puro gurūṇāṃ dṛgbhaṅgyā milanasamayaṃ jātu manāsa | apanhutya preyānkila kimapi sāmājikajanān dṛgambhojadvandvaṃ parimukulayannuttaritavān || yathā vā-āghrātaṃ kamalaṃ priyeṇa sudṛśā smṛtvāpanītaṃ mukhaṃ dattaṃ vidrumakanduke nakhapadaṃ sītkṛtya gūḍhau stanau | dattā campakakālikorasi tayā prodbhinnaromāñcayā mīlallocanamāsitaṃ caturayordūre'pi pūrṇo rasaḥ | anabhijñastu nāyako nāyakābhāsaḥ