Rasasudhakara 4.206

4.206

bhogāṅkānumitijaniterṣyāmāno yathā mamaiva—
‘ko doṣo maṇimālikā yadi bhavet kaṇṭhe na kiṃ śaṅkaro
dhatte bhūṣaṇamardhacandramamalaṃ candre na kiṃ kālimā
tat sādhveva kṛtaṃ kṛtaṃ bhaṇitibhirnaivāparādhaṃ tvayā
bhāgyaṃ draṣṭumanīśayaiva bhavataḥ kāntāparāddhaṃ mayā||’
gotraskhalanena yathā mamaiva —
‘nāmavyatikramanimittaruṣāruṇena
netrāñcalena mayi tāḍanamācarantyāḥ
mā mā spṛśeti paruṣākṣaravādaramyaṃ
manye tadeva mukhapaṅkajamāyatākṣyāḥ||’
utsvaprerṣyā yathā —
‘svaprakīrtitavipakṣamaṅganāḥ pratyabhaitsuravadantya eva tam
pracchadāntagalitāśrubindubhiḥ krodhabhinnavalayairvivartanaiḥ||’
śrutiḥ priyāparādhasya śrutirāptasakhīmukhāt
śrutijaniterṣyā māno yathā —
‘aṅgulyagranakhena bāṣpasalilaṃ vikṣipya vikṣipya kiṃ
tūṣṇīṃ rodiṣi kopane! bahutaraṃ phūtkṛtya rodiṣyasi
yasyāste piśunopadeśavacanairmāne'tibhūmiṃ gate
nirviṇṇo'nunayaṃ prati priyatamo madhyasthatāmeṣyati||’
atra piśunasakhījanopadeśajanito māno bāṣpādibhirvyajyate
kāraṇābhāvasambhūtò nirhetuḥ syād dvayorapi