Shabdatarangini p152

p152

yadyapi gaṅgāyāṃ ghoṣaḥ ityādau tīre gaṅgāpadaśakyasaṃbandhajñānamapekṣyate .
yadvā gaṅgāpadāt pravāhopasthityanantaraṃ tadadhīnatīropasthitirapekṣyate .
na cātra tathā padārthasaṃsarga padārthapratiyogikatvarūpasaṃbandhajñānaṃ vā padārthapratītyadhīnasaṃsargopasthitirvā vākyārthāvagamāt pūrvamasti .
tathāpi yatra bodhyapramāpūrvaṃ bodhyopasthitirapekṣyate tatraiva bodhyabodhakasaṃbandhajñānaṃ kāraṇam .
tīradisaṃbandhāvagāhiśābdabuddhau tīropasthiterhetutvāt .
tasyāśca gaṅgāpadabodhyapravāheṇa tīrasya saṃbandhajñānaṃ vinā asaṃbhavāt .
yatra tu bodhyapramāpūrvaṃ pramāyāṃ bodhyarūpasyopasthitirnāpekṣitā ,tatra svarūpasanneva cakṣussaṃyuktasamavāyasaṃbandhaḥ apekṣyate .
evamatra vākyārthaḥ saṃsargarūpaḥ apūrvaḥ .
ataḥ tadviṣayakaśābdapramāyāṃ tasya saṃsargasyopasthitirnāpekṣyate .
ataśca bodhyasaṃsarge bodhakapadārthasya saṃbandhajñānaṃ nāpekṣitam .
kintu svarūpasanneva padārthapratiyogikatvarūpaḥ saṃbandhaḥ prayojakaḥ .
anyathā śābdabuddheḥ pramātvānupapatteḥ .